पिएम कपके उपाधि एपिएफहे

५ लाख सहित ट्रफी ओ मेडल

पहुरा समाचारदाता
धनगढी, ११ पुस । विभागीय टीम एपिएफ क्लव प्रधानमन्त्री कप महिला राष्ट्रिय क्रिकेट प्रतियोगिताके उपाधि जिटले बा । एपिएफसे प्रदेश १ हे पराजित करटी सुदुरपश्चिम प्रदेशके अस्थायी राजधानी धनगढीमे हुइल प्रधानमन्त्री कप महिला राष्ट्रिय क्रिकेट प्रतियोगिताके उपाधि जिटल हो ।

धनगढीके फाप्ला क्रिकेट मैदानमे हुइल फाईनल खेलमे प्रदेश १ हे ७ विकेटसे हरैटी च्याम्पीयन हुइल हो । उपाधि जिटलसंगे विभागीय टीम एपिएफसे नगद ५ लाख सहित ट्रफी ओ मेडल प्राप्त करले बा । उपविजेता हुइल प्रदेश १ से नगद ३ लाख सहित ट्रफी ओ मेडल पैले बा ।

एपिएफसे टस जिटके पहिले फिल्डिङ रोजलपाछे प्रदेश १ से व्याटिङ करटी २० ओभरमे ६ विकेट क्षतिमे ६७ रन बनाइल । खराब व्याटिङ करल प्रदेश १ के लाग कप्तान रुविना क्षेत्री ३४ रन बनैली । अप्सरी वेगमसे ११ रन बनैना बाहेक और खेलाडीसे दोहोरो रन अंक जोरे नइसेकल । एपिएफके लाग सीता राना मगर ३ ओ रेखा रावल २ विकेट लेटी ।

प्रदेश १ से डेहल ६८ रनके लक्ष्य एपिएफसे १४ दशमलव २ ओभरमे ३ विकेट क्षतिमे पुरा करल । एपिएफके लाग ओपनर ज्योती पाण्डेयसे अविजित ३७ रन बनैली । ममता चौधरी १७ रन ठप्ली । ७ रनमे दुई विकेट गुमाके दबाबमे आइल एपिएफहे ज्योती ओ ममता जितसम डोराइल हुइट । प्रदेश १ के लाग कप्तान रुविना क्षेत्री ३ विकेट लेली । खेलमे एपिएफके सीता राना मगर प्लेयर अफ द म्याच हुइली । नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सह आयोजनामे पुस ३ गतेसे सुरु हुइल प्रतियोगिता अँटवार सेकल बा ।

प्रधानमन्त्री कप महिला क्रिकेटः विधामे प्रदेश १ के कब्जा

प्रधानमन्त्री कप महिला राष्ट्रिय क्रिकेट प्रतियोगिताके उपाधिउप्पर एपिएफसे कब्जा करेबेर प्रतियोगिताके विधामे भर प्रदेश १ से कब्जा जमाइल बा । प्रतियोगिताके उत्कृष्ट खेलाडी, उत्कृष्ट ब्याट्सओम्यान ओ उत्कृष्ट बलर करके तीनु विधामे प्रदेश १ बाजी मारल हो । प्रदेश १ के कप्तान रुविना क्षेत्री प्रतियोगिताके उत्कृष्ट खेलाडी हुइली । उहाँ नगद २५ हजार सहित मेडल पैली । उहाँ प्रतियोगितामे ५ खेल खेलेबेर १५७ रन बनैली । जेम्ने उहाँक एक अर्धशतक सामेल रहल बा ।

सर्वाधिक ७६ रनके पारी खेलल उहाँ प्रतियोगितामे १९ चौका प्रहार करली । बलिङओरफे उहाँ सर्वाधिक विकेट लेना खेलाडीके दुसरा नम्बरमे रहेबेर ८ विकेट हात परली । प्रतियोगिताभर १६ ओभर बलिङ करल उहाँ २ दशमलव ७५ के ईकोनोमीमे ४ ओभर मेडन रख्टी ४४ रन खर्चली ।

प्रतियोगितामे प्रदेश १ के अप्सरी वेगम उत्कष्ट ब्याट्ओम्यान हुइली । उहाँ प्रतियोगितामे एक सय ७६ रन बनैली । जेम्ने उहाँक दुई ठो अर्धशतक बनैले रही । प्रतियोगितामे दोहोरो अर्धशतक बनैना ऐक्ली खेलाडी वेगमसे १ छक्का डारेबेर ९ चौका प्रहार करली ।

प्रतियोगितामे प्रदेश १ के अलिशा खाडिया उत्कृष्ट बलर हुइली । उहाँ प्रतियोगिताके ५ खेलमे ९ विकेट लेली । १७ ओभर बलिङ करल उहाँ २ दशमलव ५२ के ईकोनोमी धारबेर ५ ओभर मेडन करटी ४३ रन खर्चली ।