सुदूरपश्चिममे थप १२ जहनमे कोरोना संक्रमण
पहुरा समाचारदाता
धनगढी, १२ पुस । विटल २४ घण्टामे सुदूरपश्चिम प्रदेशमे थप १२ जहनमे कोरोना संक्रमण डेखाइल बा ।
मंगरके रोज स्वास्थ्य निर्देशनालय राजपुर डोटीसे डेहल जानकारी अनुसार ५६ जहनके आरटी–पीसीआर परीक्षण करलमे १२ जहनमे कोरोना पुष्टि हुइल हो । ५ सय ८७ जहनमे एन्टिजेन विधिसे परीक्षणमध्ये केक्रोमे फेन पोजिटिभ नैडेखाइल रहे ।
ओस्टेक, बिटल २४ घण्टामे देशभर २५१ जहनमे कोरोना भाइरसके संक्रमित थपल बटैं । नौ हजार १५६ जहनमे आरटीपीसीआर परीक्षण करलमे २५१ जहनमे कोरोना संक्रमण हुइल स्वास्थ्य तथा जनसंख्या मन्त्रालय जनैले बा । ओस्टेक, एक हजार ७२९ जहनमे एन्टीजेन परीक्षण करलमे २० जहनमे कोरोना संक्रमण डेखाइल बा । स्वास्थ्य मन्त्रालय नेपालमे कोरोना संक्रमणमुक्त हुइना दर ९७.९ प्रतिशत रहल जनैले बा ।
पछिल्का २४ घण्टामे २२५ जाने कोरोनामुक्त हुइल स्वास्थ्य मन्त्रालय जनैले बा । ओहे अवधिमे एक जाने संक्रमितके मृत्यु हुइल स्वास्थ्य मन्त्रालय जनैले बा । यीसँगे नेपालमे कोरोनासे मृत्यु हुइनाके संख्या ११ हजार ५८६ पुगल बा ।
