कैलारीमे माघके तीन दिन बिदा

पहुरा समाचारदाता
हसुलिया, २७ पुस । कैलालीके थारु बहुल कैलारी गाउँपालिका थारु समुदायके सबसे बरवार टिहुवार माघ (माघी)के अवसरमे तीन दिन सार्वजनिक बिदा डेना निर्णय करले बा ।

उ गाउँपालिकाके कार्यालयपालिका बैठकसे गाउँपालिकाभर माघके अवसरमे तीन दिन बिदा डेना निर्णय करल हो । पुस ३० से माघ २ गतेसम सक्कु सरकारी कार्यालय, विद्यालय, सार्वजनिक संस्थान, बैंक तथा वित्तीय संस्थामे तीन दिन बिदा रहना गाउँपालिकाके सूचना अधिकारी यगम कलेल जानकारी डेलै ।

माघ थारु समुदायके सबसे बरवार टिहुवार हो । ओस्टके लावा बरस फेन । कैलारी गाउँपालिकामे ९७ प्रतिशत थारु जातिके बसोबास रहल बा । थारु समुदाय तीन दिन धुमधामके साथ टिहुवार मनैना करल ओरसे गाउँपालिका तीन दिन सार्वजनिक बिदा डेहल सूचना अधिकारी कलेल बटैलै । आघेक बरस फेन उ गाउँपालिकासे माघके अवसरमे तीन दिन सार्वजनिक बिदा डेटी आइल रहे ।

माघ टिहुवारसे थारु समुदायके लावा बरस फेन सुरु हुइना करठ् । इ समुदायके मनै पुस अन्तिम् दिनसे माघ २ गतेसम धुमधामके साथ माघ टिहुवार मनैना करठै । टिहुवार लच्क्याइलसंगे थारु बस्तीमे चहलपहल सुरु होसेकल बा । माघमे धमार गैना ओ मघौटा नाच नाचके मनोरञ्जन कैना चलन रहल बा ।

माघ टिहुवारके अवसरमा उ गाउँपालिकाके वनदेवी, अपरम्पार बाबा लगायतके ठाउँमे माघी मेलासमेत लग्ना करल बा । यद्यपि, इ बरस कोरोना महामारीके सङ्क्रमण तीव्र गतिमे फैलटी रहल ओरसे मेला, महोत्सव नैकैना जिल्ला प्रशासन कार्यालय कैलाली आग्रह करले बा ।