सार्वजनिक स्थलमे अनिवार्य खोप लगाइल कार्ड डेखाइपर्ना
पहुरा समाचारदाता
धनगढी, २८ पुस । जिल्ला प्रशासन कैलाली स्मार्ट लकडाउन सहित कडाइ कैना हुइल बा । कोभिड–१९ के बह्रटी रहल संक्रमणहे मध्यनजर कैटी प्रशासनसे लकडाउन सहित कडाइ कैना हुइल हो ।
बुधके एक सुचना जारी कैटी जिल्ला प्रशासन कार्यालय कैलाली रात १२ बजेसे अनिश्चितकालके लाग लागू हुइना मेरके टमान निर्णय करल प्रशासन जनैले बा ।
कोरोनाके रोकथाम, नियन्त्रण ओ उपचारहे थप प्रभावकारी बनैना कोभिड–१९ संकट व्यवस्थापन केन्द्र (सिसिएमसी) के सिफारिस एवं गृहमन्त्रालयके निर्णय, संक्रामक रोग नियन्त्रण ऐन, २०२० के दफा २ ओ स्थानीय प्रशासन ऐन, २०२८ के दफा ६ से डेहल अधिकार प्रयोग कैके उक्त आदेश जारी करल हो ।
आब सार्वजनिक स्थलमे मास्कके प्रयोग ओ साबुन पानीसे हात ढुइना जैसिन स्वास्थ्य मापदण्डके पालना अनिवार्य करैना प्रशासनके आदेश रहल बा । ओस्टके भिडभाड तथा राजनीतिक गतिविधिमे रोक लगाइल बा । सार्वजनिक ठाउँमे २५ जानेसे ढिउर भेला करे नैपैना हो ।
सार्वजनिक स्थलमे जाँदा माघ ७ से खोप लगाइल कार्ड डेखाइ पर्ना नियम लागू करल बा । ओस्टके माघ १५ सम विद्यालय बन्द रहना बावै । पूर्वनिर्धारित सेमेस्टर तथा वार्षिक परीक्षाके हकमे स्वास्थ्य मापदण्ड पालना हुइना मेरके जेड आकारमे बैठाके व्यवस्था कैके सञ्चालन कैना अनुमति डेहल बा ।
