ट्रफी सार्वजनिक, तयारी पुरा

पहुरा समाचाररदाता
धनगढी, १ फागुन । धनगढीमे काल्ह (अँटवार) से सुरु हुइना विद्यालयस्तरीय यु–१९ राष्ट्रिय क्रिकेट प्रतियोगिता लिटल फलावर प्रिमियर लिग (एलपीएल) छैटौँ संस्करणके ट्रफी सार्वजनिकसंगे तयारी पुरा हुइल बा ।

आयोजक लिटल फलावर स्पोर्ट्स एण्ड इभेन्ट्ससे आज खेल मैदानमे कैगिल पत्रकार सम्मेलनमे ट्रफी सार्वजनिकसंगे सक्कु तयारी पुरा हुइल जनैले बा । उ प्रतियोगिताके ट्रफी सार्वजनिक मुख्य प्रायोजक धनगढी उपमहानगरपालिकाके नगर प्रमुख नृप बहादुर ओ क्यानके केन्द्रीय सदस्य विक्रम विष्ट करले रहिट । लिटल फलावर स्पोर्ट्स एण्ड इभेन्ट्सके अध्यक्ष रामचन्द्र शाही आजसे हुइना प्रतियोगिताके सक्कु पुरा हुइल बटैलै । प्रतियोगिताके उदघाटन अँटवारसे विहान १० बजे हुइना ओ फागुन १४ गतेसम सञ्चालन हुइना उहाँ जनैलै ।

प्रतियोगिताके विजेताहे १ लाख ५० हजार ओ उप–विजेताहे ७५ हजार नगदसहित ट्रफी, मेडल ओ प्रमाणपत्र प्रदान कैना लिटल फलावर स्पोर्ट्स एण्ड इभेन्ट्सके अध्यक्ष शाही बटैलै ।

प्रतियोगिताके सर्वोत्कृष्ट खेलाडीहे २० हजार, उत्कृष्ट बलर, ब्याट्सम्यान तथा उदयमान खेलाडीहे १०÷१० हजार प्रदान कैना शाही जानकारी डेलै । प्लेयर अफ द म्याचके साथे आसन्न संस्करणसे प्रत्येक खेलहे थप रोमाञ्चक बनैना गेम चेन्जर अवार्ड ओ सर्वोत्कृष्ट छक्का अवार्ड समेत थप करल आयोजक जनैले बा ।

प्रतियोगितामे काठ्माण्डौँ, कैलाली ओ कञ्चनपुरके १० विद्यालय स्तरीय क्रिकेट टिमके सहभागिता रही । जेम्ने प्रत्येक टिम ४ जाने विद्यालय बाहिरके १९ वर्ष टरेक खेलाडी समेत धारे पैही । आसन्न संस्करणमा नेपाली राष्ट्रिय क्रिकेट टिमके कप्तान देव खनाल, उप कप्तान शेर मल्ललगायतके खेलाडी समेत सहभागी हुइही । प्रत्येक टिमहे दुई समूहमे विभाजन करके समूह चरणमे एक टिमहे ४÷४ ठो खेल खेलाजाई ।