गेटा मेडिकल कलेज सञ्चालनमे ढिलाइ
पहुरा समाचारदाता
धनगढी, १ फागुन । मेडिकल कलेज कौन मोडलमे सञ्चालन कैनाबारे सरकार हालसम कानुनी निर्क्योल नैकरेबर कैलालीके गेटा मेडिकल कलेज सञ्चालनमे अन्योल डेखल बा ।
मेडिकल कलेज सञ्चालनके लाग झन्डे ५ अर्ब लागतमे तयार उ भवन बिगरके जैना जोखिम बह्रटी गैल बा । तीन बरससे अन्योल कायमे रहेबर मेडिकल कलेज सञ्चालनमे अन्योल डेखल हो ।
यहोर सुदूरपश्चिम प्रदेश सरकारके मुख्यमन्त्री त्रिलोचन भट्ट भर तत्काल आवश्यक कानुनी प्रबन्ध कैके मेडिकल कलेज हाली सञ्चालन हुइ पर्ना माग रख्टी अइलेसे फेन कौइ नैसुन्ना करल बटैलै । संघ ओ प्रदेश सरकारके साझेदारीमे सञ्चालन कैना रलेसे फेन अपनेहुक्रे तयार रहल मुख्यमन्त्री भट्टके कहाइ बा ।
मेडिकल कलेज पूर्वाधार विकास समिति गेटा कैलालीके कार्यकारी निर्देशक हेमराज पुजाराके अनुसार इहीसे आघे एकीकृत स्वास्थ्य शिक्षा प्रतिष्ठान विधेयक तीन बरससे मन्त्रिपरिषद्मे थन्कल बा ।
प्रस्तावित विधेयकअनुसार गेटा, बुटवल, बर्दिबास ओ सुर्खेतमा स्थापना हुइना मेडिकल कलेजहे लक्षित कैके एकीकृत स्वास्थ्य विज्ञान प्रतिष्ठानके अवधारणा लेहल पुजारा बटैलै ।
यहोर, थन्कल उ प्रस्तावित विधेयकके खाकामे फेन इ क्षेत्रके बासिन्दा सहमत नैहुइट । ढिउर प्रतिष्ठान बनैनासे छाता संरचना बनाके गेटा मेडिकलहे फेन उहे एकीकृत प्रतिष्ठानभित्रे समेट्ना योजना बनाइल बा ।
उ प्रावधानअनुसार गेटा मेडिकल कलेज आंगिक निकायके रूपमे रहना अवस्था रहल बा । सरकारसे २०६७ मे मेडिकल कलेज प्रवर्द्धन समिति बनाइल रहे । पाछे शिक्षा विज्ञान तथा प्रविधि मन्त्रालयअन्तर्गत २०७२ मे यहाँके भौतिक पूर्वाधार मेडिकल कलेज पूर्वाधार विकास समिति गेटा कैलाली गठन कैके काम आघे बह्राइल रहे ।
६ सय शøयाके अस्पताल ओ मेडिकल कलेज सञ्चालनके लाग आवश्यक भवनलगायत २७ ठो अत्याधुनिक भवन तयार होसेकल बा । अस्पताल, कलेज, प्रशासनिक भवन, छात्रावास, निवासलगायत सात ठो प्याकेजअन्तर्गत भवन पूर्वाधारके काम हुइल हो ।
पर्खाल, ५ ठो निवास भवन, तटबन्धके काम फेन सम्पन्न होसेकल बा । विद्युतीकरणके लाग टेन्डर होसेकल बा । हस्पिटल कलेज, प्रशासनिक छात्रावास कैके ५ ठो भवन इहीसे आघे नै निर्माण कम्पनी विकास समितिहे हस्तान्तरण करसेकल बा । आब बाहेरके काममे खानेपानी ओ फोहरमैला व्यवस्थापनके पूर्वाधार बनैना बाँकी रहल बा ।
