सुदूरपश्चिममे कोरोना संक्रमणदर घटल
एक हजार ५ सय ४६ जाने सक्रिय संक्रमित
पहुरा समाचारदाता
धनगढी, १ फागुन । सुदूरपश्चिम प्रदेशमे कोरोना भाइरसके संक्रमण दर हवाट्टे घटल बा । स्वास्थ्य निर्देशनालयसे डेहल जानकारी अनुसार अँटवारके रोज जम्मा २३ जनहनमे केल कोरोना संक्रमण पुष्टि हुइल हो ।
पछिल्का २४ घण्टामे एन्टीजेन ओ आरटी पीसिआर विधिसे ९ सय ६० जानेक कोरोना परिक्षण करेबेर २३ जनहनमे संक्रमण पुष्टि हुइल निर्देशनालय जनाइल हो । उहे अवधिमे १३ जाने कोरोना मुक्त हुइल बटै । ओस्टेक शनिच्चरके रोज एक हजार एक सय २४ जानेक कोरोना परिक्षण करेबेर ४० जनहनमे संक्रमण पुष्टि हुइलबेर ६७ जाने कोरोना मुक्त हुइल रहिट ।
प्रदेशमे अँटवारसम आरटी पीसिआरके २ सय ६७ ओ एन्टीजेनके १ हजार २ सय ७९ करके एक हजार ५ सय ४६ जाने कोरोनाके सक्रिय संक्रमित बटै ।
जेम्ने कैलालीमे सबसे ढेर ७ सय ८० जाने रहल बटै । ओस्टेक कञ्चनपुरमे ३ सय २५ जाने, अछाममे ३२, बैतडीमे १ सय ३७, बझाङ ३४, बाजुरा १सय १२, डडेल्धुरामे ५३, दार्चुलामे ४६, डोटीमे २७ ओ अन्य करके अब्बे १ हजार २ सय ७९ करके एक हजार ५ सय ४६ जाने कोरोनाके सक्रिय संक्रमित रहल निर्देशनालय जनैले बा ।
अँटवारके रोज सुदूरपश्चिम प्रदेशके टमान सिमानाकासे ९ सय ८५ जाने नेपाल भिटरेबेर ओइनके एन्टीजेन विधिसे कोरोना परिक्षण करेबेर ६ जनहनमे संक्रमण पुष्टि हुइल रहे । जेम्ने कञ्चनपुरके गडडाचौकीसे ३ सय ८७ जाने ओ कैलालीके गौरीफन्टा नाकासे ५ सय ९८ जाने नेपाल भिटरल बटै । प्रदेशमे अब्बेसम ४ लाख ९२ हजार ६ सय ४२ जानेक कोरोना परिक्षण करेबेर ५९ हजार २ सय ५ जनहनमे संक्रमण पुष्टि हुइल ओ ६ सय २७ जाने कोरोना संक्रमण पुष्टि व्यक्ति ज्यान गुमाइल निर्देशनालय जनैले बा ।
पुस ३० गतेक तथ्याङक हेरेबेर एन्टीजेन ओ आरटी पीसिआरके ३ सय ८३ जाने जनहनमे संक्रमण डेखल रहे । कलेसे सबसे उच्च माघ १० गते ६ सय ५२ जनहनमे संक्रमण डेखल रहे । ओकरपाछे संक्रमणदर घटटी गैल बा । अब्बेक संक्रमण दर हेरेबेर माघ २८ गते ४७ जनहनमे संक्रमण डेखल बा कलेसे ८८ जाने चोखाइल बटै ।
ओस्टेक पछिल्का २४ घण्टामे देशभर ५२१ जनहनमे कोरोना संक्रमण पुष्टि हुइल बा । उहे अवधिमे ठिक हुइल संख्या भर ३९३५ जाने रहल स्वास्थ्य तथा जनसंख्या मन्त्रालय जनैले बा ।
मन्त्रालयके अनुसार पछिल्का २४ घण्टामे १० हजार ११५ जानेक नमुना परीक्षण हुइल रहे । ओस्टेक पछिल्का २४ घण्टामे १० जाने संक्रमितके मृत्यु हुइल बा । हाल देशभर सक्रिय संक्रमित २२ हजार ५८४ जाने रहल बटै ।
