विविसिसे १० जाने महिलाहुकन बार्वरके निःशुल्क तालिम ओ रोजगारी डेना

पहुरा समाचारदाता
धनगढी, २ फागुन । विविसि तालिम केन्द्रसे हिंसापीडित अप्ध्यारोमे परल १० जाने महिलाहुकन बार्वर( पुरुषके डह्री भुटला कटना) निःशुल्क तालिम ओ रोजगारी डेना जनैले बा ।

गिताञ्जली यूनिसेक्स सैलुन धनगढीके आयोजना तथा वि.वि.सि.तालिम केन्द्रके सहकार्यमे १० जाने महिलाहुकनहे निःशुल्क तालिम प्रदान कैना अँटवारके रोज धनगढीमे आयोजित पत्रकारमे जानकारी डेहल बा । वि.वि.सि.तालिम केन्द्रके प्रमुख झुम अधिकारी हिंसा पीडित अप्ध्यारोमे परल १० जाने महिलाहुकन बार्वर( पुरुषके डह्री भुटला कटना) निःशुल्क तालिम ओ रोजगारी डेना बटैलै ।

उहाँ कहलै, हम्रे अपने सहयोगमे बार्वर (पुरुषके डह्री भुटला कटना) तालिम संचालन करटी तालिम लेहे चाहल महिलाहुनके लाग दुई महिने निःशुल्क तालिम प्रदान कैजाई तालिम पश्चात ओइनहे रोजगारीफे डेजाई । ग्रामीण भेगसे अइनाहे खाना ओ बैठनासमेट व्यवस्था कैना उहाँ जनैलै । धनगढी उपमहानगरपालिकामे २ सयसे ढेर सैलुन रहलमे ६० ठो केल दर्ता हुइल बा ।

२ सय सैलुनमे एक ठो ३ जाने कामदार बटै । ओम्नसे ६ सय मन्से ७० प्रतिशत (४२०) जाने भारतीय रहल उहाँ जनैलै । एक जाने मासिक २५ हजारके दरसे कमाईबेर ११ लाखके आसपास नेपाली रुप्या बाहेर जैटी रहल उहाँ बटैलै । विविसि तालिम केन्द्र विगत २०११ से सिटिइभिटीसे ३ सयसे ढेरमे महिलामुखी तालिम प्रदान करल अधिकारी बटैलै । ओइन मन्से पार्लरके तालिम लेहल २ सय जाने रोजगारी तथा अपने पार्लर खोलके रोजगार पाइल उहाँ जनैलै ।

ओस्टेक फेरसे अब्बे १० जाने महिलाहुकनके अपने लगानीमे दुई महिने निःशुल्क बार्वर डेना ओ बैशाखसे ओइनहे रोजगारीफे डेना उद्देश्यसे तालिम डेहे लागल अधिकारी जनैलै ।

ओस्टेक पत्रकार महासंघ कैलालीके सभापति हिमालय जोशी तालिमके सूचना खोलके ओ पह्रके उदघाटन करल रहिट ।