दुई हजार ३०० विद्यालयमे ‘आईसीटी ल्याब’ स्थापना कैना
काठमाडौं, ५ फागुन । सरकार दुई हजार ३ सय विद्यालयमे एक्के साथ ‘आईसिटी ल्याब’ स्थापना कैना हुइल बा ।
शिक्षा, विज्ञान तथा प्रविधिमन्त्री देवेन्द्र पौडेलसे सार्वजनिक विद्यालयके शैक्षिक सुधारके लाग २३ सय ठो विद्यालयमे आईसिटी ल्याब तत्काल बनैना निर्णय करल जानकारी डेहल हुइट ।
शिक्षा पत्रकार समूहसे बिफेक रोज काठमाडौंमे आयोजना करल एक कार्यक्रममे बोल्टी उहाँ ३ वर्षभिटर देशभरके सक्कु विद्यालयमे उ ल्याब स्थापना कैना सरकारके योजना रहलफे स्पष्ट परलै ।
मन्त्री पौडेल सार्वजनिक विद्यालयहुकनके भौतिक पूर्वाधारमे कौनो समस्या नहोए कनामे सरकार सचेत रहल बटैलै । उहाँ सार्वजनिक विद्यालयके शैक्षिक सुधारके लाग सम्बन्धित सक्कु निकायहे सचेत हुके काम कैना फे निर्देशन डेलै ।
‘२३ सय ठो विद्यालयमे आईसिटी ल्याब तत्काल बनैना निर्णय करले बटी । यकर प्रक्रिया हाली आघे बह्री । क्रमशः ३ वर्षभिटर देशभरके सक्कु सार्वजनिक विद्यालयमे उहीहे निर्माण करजाई ।’ मन्त्री पौडेल कहलै,’ सार्वजनिक शिक्षाहे सुधार करेक लाग भौतिक पूर्वाधारके अभाव हुइल ठाउँमे व्यवस्था कैना कामहेफे सरकारसे सुरु करल बा । मने ओकर लाग सरोकारवाला निकायहुक्रे सेक्ना सहयोग करे पर्ना रहठ ।’
मन्त्री पौडेल सार्वजनिक विद्यालयहुकनके शैक्षिक गुणस्तर खस्के नइडेना करके १८ हजार शिक्षकहुकनके नयाँ दरबन्दीके व्यवस्था करे परल बटैलै ।
