मसुरियामे शहरी स्वास्थ्य केन्द्रके भवन उद्घाटन
पहुरा समाचारदाता
मसुरिया, ५ फागुन । मसुरिया शहरी स्वास्थ्य केन्द्रके भवन उद्घाटन तथा सेवा सञ्चालन बिफेक रोजेसे सुरु हुइल बा ।
गौरीगंगा नगरपालिका वडा ९ के रजिया चौक बनखेतमे निर्माण हुइल स्वास्थ्य केन्द्र भवनके सुदूरपश्चिम प्रदेश सरकारके भौतिक पूर्वाधार विकास मन्त्री माननीय दीर्घबहादुर सोडारी उद्घाटन करलैं ।
स्थानीय बासिन्दाके माग ओ आवश्यकता अनुसार डगरके स्तरवृद्धि कैके बनखेत रजिया सडक विस्तार करना प्रदेश सरकारके ओरसे निरन्तर रूपमे काम हुइटिरहल ओ कान्द्रा सिँचाइ आयोजनाके काम हुइटिरहल अवसरमे मन्त्री सोडारी बटैलैं ।
नगर शहरी स्वास्थ्य केन्द्र व्यवस्थापन समितिके अध्यक्ष तथा वडाध्यक्ष हरिप्रसाद तिवारीके अध्यक्षतामे हुइल कार्यक्रममे मसुरिया स्वास्थ्य चौकीमे प्रमुख लालप्रसाद पन्त स्वागत करले रहैं ।
वडाके विकट क्षेत्र रजिया बनखेतमे शहरी स्वास्थ्य केन्द्रके निर्माण स्थानीय बासिन्दाहे स्वास्थ्य सेवा सहज हुइना बटैटि वडाध्यक्ष तिवारी टेलिफोन नेटवर्कके समस्या रहल ओ ओकर समाधानके लाग पहल करना मन्त्री सोडारीके ध्यानाकर्षण करले बटैं ।
स्वास्थ्य कार्यालय कैलालीके प्रमुख लालबहादुर धामी स्वास्थ्य केन्द्रहे व्यवस्थित ओ सुरक्षित ढरना स्थानीय समुदायके महत्वपूर्ण भूमिका रहल कटि स्वास्थ्य व्यवहार जीवन नागरिकके आवश्यकता रहल बटैं । उहाँ ग्रामीण भेगमे सापके दंश जोखम रहल ओरसे स्वास्थ्य जीवनशैली अपनाइ परना स्वास्थ्य सञ्चार आवश्यक रहल बटैंलैं ।
नगर स्वास्थ्य केन्द्रमे ३ जाने स्वास्थ्यकर्मी सेवा प्रदान करहि ।
सुदूरपश्चिम प्रदेश सरकारके सामाजिक विकास मन्त्रालयके आर्थिक वर्ष २०७७/०७८ सालके विनियोजन रकम १५ लाख रुपैयाँके लागतमे भवन निर्माण हुइल हो ।
