साझा अधिकारके कानुन नैबनके काम कैना समस्याः मुख्यमन्त्री भट्ट
पहुरा समाचारदाता
धनगढी, ७ फागुन । सुदूरपश्चिम प्रदेशके मुख्यमन्त्री त्रिलोचन भट्ट संघीय सरकारसे साझा अधिकारके कानुन नैबनाके प्रदेशमे काम कैना असहज हुइल बटैले बाटै ।
७२ औँ प्रजातन्त्र दिवसके अवसरमे प्रदेश सरकारसे आयोजना करल कार्यक्रममे उहाँ प्रदेश गठन हुइल चार बरस हुइलेसे फेन साझा अधिकार कार्यान्वयन नैहोके सोचलअनुसारके काम हुइ नैसेकल बटाइल हुइट । प्रदेश सरकार गठन हुइल लम्मा समय बित्लेसे फेन साझा अधिकार नैरहल कारण प्रहरी समायोजन, कर्मचारी भर्ना करे नैसेकल बटाइल हुइट ।
‘संविधानसे एकल ओ साझा अधिकार हम्रहीनहे डेले बा । अब्बे फेन साझा अधिकारके कानुन बनेबर कुछ काम कैना असहज हुइल बा,’ उहाँ कहलै, ‘जेकर कारण हम्रे प्रदेश सरकार गठन हुइल लम्मा समय बित्लेसे फेन प्रहरी समायोजन, कर्मचारी भर्ना जैसिन कार्य करे नैसेकट हुइ ।’
अब्बे प्रदेश सरकार तीनठो सरकारके एकल अधिकार प्रयोग कैटी रहल ओ संघीय सरकार सुस्त हुइल कारणसे प्रदेश सरकारसे टमान समस्या भोग्टी रहल बटैलै ।
‘अब्बे हम्रे एकठो सोचसे काम कैटी रहल बाटी । एकात्मक सोच । उ सोचके अन्त्य नैकैके हम्रे नागरिकहे सेवा ओ सुविधा डेहे नैसेकब,’ उहाँ कहलै ।
प्रदेशके मन्त्रालयमे पठैना प्रशासनिक प्रमुखमे फेन सङ्घीय सरकारसे मनलाग्दी कैटी रहल मुख्यमन्त्री भट्ट बटैलै । प्रदेश सरकारमे अउइया कर्मचारी कब अइही, कै बजे जैठै कना बात आपनहे जानकारी नै रहल बटैटी संघीय सरकारहे हालीसे हाली साझा अधिकार कार्यान्वयन कैना आग्रह करलै ।
‘अब्बे संघीय सरकारके फेन मनलाग्दी हुइटी रहल बा,’ उहाँ कहलै, ‘प्रदेश सरकारमे अउइया कर्मचारी कौन बेला अइठै कौन बेला जैठै उ हम्रहीनहे पता नैरहठ् । संघीय सरकारके मन लागठ् कलेसे राखठ् मन नैलागठ् कलेसे नैराखठ् । उहे मारे मै इहे प्रजातन्त्र दिवसके अवसरमे संघीय सरकारहे आग्रह करटुँ । साझा अधिकारके विषयहे हालीसे हाली कार्यान्वयन करेबर सबसे उचित रही ।’
सुदूरपश्चिम प्रदेश विकासमे विगतसे नै विकासमे पाछे परल स्मरण करैटी मुख्यमन्त्री भट्ट प्रदेशमे ढिउर प्राकृतिक स्रोत रलेसे फेन साधन स्रोत नैरहल कारण प्राकृतिकहे परिचालन करे नैसेकल बटैलै ।
