सुदूरपश्चिममे ७ सय ६ पीडित
पहुरा समाचारदाता
धनगढी,७ फागुन । सुदूरपश्चिम प्रदेशमे सन २०२१ मे ७ सय ६ जाने पीडित हुइल बटै ।
शनिच्चरके रोज धनगढीमे सार्वजनिक हुइल उ पुस्तकके ३० औं संस्करणमे देशभर ६ हजार २ सय ८५ जाने पीडित हुइल जनाइल बा । जेम्ने सुदूरपश्चिम प्रदेशके ७ सय ६ जाने पीडित हुइल बटै । उ मन्से मानव अधिकार उल्लंघनके घटनामे दुई महिला ओ १९ पुरुष करके २१ जाने पीडित हुइल बटै ।
गैल बरस सन २०२० मे मान अधिकार उल्लंघन ओ ज्यादतीके घटनामे ५ सय १७ जाने पीडित हुइल रहिट । उ मन्से मानव अधिकार उल्लंघनके घटनामे तीन महिला ओ ४९ पुरुष सहित ५२ जाने पीडित हुइल रहिट कलेसे ज्यादतिके घटना मे ४ सय १६ महिला ओ ४९ पुरुष सहित ४ सय ६५ जाने पीडित हुइल रहिट ।
इन्सेक प्रदेश संयोजक खडकराज जोशी राज्यपक्षसे हुइना घटनामे कमी अइलेसे गैर राज्यपक्षसे हुइना घटनामे बृद्धि हुइल जनैलै । उहाँ कहलै, सन २०२१ मे विगतके बर्ष जस्टे महिलाउप्पर हुइना हिंसाके घटनामे कमी नइआइल । यी बरस महिलाउप्पर हुइना हिंसाके घटना घटेक छोरके बह्रल पाइल बा कलेसे घटनाके प्रवितिमे तात्विक भिन्नताफे पाइल बा ।’
सन २०२१ मे बाल अधिकारमे घटनामे ७९ जाने बालिका, दुई जाने बालक करके ८१ जाने बालबालिका पीडित हुइलै । यी बरस हुइल बाल अधिकारके घटनामे बालविवाहसे तीन जाने, बेचविखन तथा ओसार पसारसे ६ जाने विद्यालयमे शारिरीक दण्ड सजाससे दई जाने, बलात्कार घटनामे ४७ जाने ओ यौन दुव्र्यवाहारके घटनामे २२ जाने पीडित हुइल प्रदेश संयोजक जोशी बटैलै । एक जाने नवजात शिसुके हत्या करलफे पाइल बा । सन २०२० मे बाल अधिकारके घटनामे ८१ जाने बालिका ओ एक जाने बालक करके ८२ जाने बालबालिका पीडित हुइल उहाँ बटैलै ।
यी बरस महिला उप्पर हुइल ंिहंसाके घटनामे ५ सय ३३ जाने हुइल उ पुस्तकमे अभिलेख करल बा । जेम्ने बेचविखन प्रयाससे ६ जाने, घरेलु हिंसासे ४ सय ४० जाने, कथित बोक्सीके आरोपमे एक जाने, बहुविवाहसे २३ जाने, बलात्कारके घटना ३७ जाने, बलात्कार प्रयासके घटना १४ जाने, ओ यौन दुव्र्यवहारके घटनामे एक जाने करके ५ सय ३३ जाने पीडित हुइल इन्सेक प्रदेश संयोजक बटैलै ।
ओस्टेक करके यी बरष कारागारमे कैदी बन्दीके क्षमतासे ढेर कैदीबन्दी धारल ओरसे व्यवस्थापनमे समस्या हुइलफे जनाइल बा । प्रदेशके क्षमता ६ सय रहलमे २०२१ के अन्त्यसम १ हजार ४ सय ७४ जाने कैदीबन्दी कारागारमे रहल पाइल बा । कैलाली कारागारके क्षमता एक सय ५० रहलमे यहाँ ५ सय २६ जाने रहल बटै कलेसे और जिल्लाके कारागारमे उहे अवस्था रहल बा ।
इन्सेकसे सन १९९२ से नेपाल मानव अधिकार बर्ष पुस्तक प्रकाशन करटी बा । यी पुस्तक राजधानी लगायत सातु प्रदेशमे एक साथ सार्वजनिक हुइल बा । सुदूरपश्चिम प्रदेशमे उ पुस्तकके ३० औ्र संस्करणके आन्तरिक मामिला तथा कानून मन्त्री पूर्णा जोशी सार्वजनिक करल रहिट । यिहे विच अछामके प्रतिनिधि शिवराज ढुङगानाहे नगद ४ हजार सहिट सम्मान कैगिल बा ।
उ कार्यक्रममे आन्तरिक मामिला तथा कानून मन्त्री पूर्णा जोशी, मुख्यन्याधिवक्ता कुलानन्द उपाध्याय, प्रमुख जिल्ला अधिकारी किरण थापा, जिल्ला प्रहरी प्रमुख विश्व अधिकारी, राष्ट्रिय मानव अधिकार आयोगके सुदूरपश्चिम प्रदेश प्रमुख मोहनदेव जोशी लगायत मन्तव्य व्यक्त करले रहिट । इन्सेक प्रदेश संयोजक खडकराज जोशीके अध्यक्षतामे हुइल कार्यक्तममे स्वागत मन्तव्य इन्सेक सदस्य चित्र पनेरु ओ संचालन प्रलेख अधिकृत कृष्ण विक करले रहिट ।
