सिकलसेल एनिमिया ओ थालासेमियाो बिरामीके स्वास्थ्य परीक्षण
पहुरा समाचारदाता
हसुलिया, ९ फागुन । कैलालीके हसुलियामे सिकलसेल एनिमिया ओ थालासेमियाके बिरामीके स्वास्थ्य परीक्षण करल बा ।
सेती प्रादेशिक अस्पताल ओ कैलारी गाउँपालिकाके आयोजनामे एक दिने स्वास्थ्य शिविरके आयोजना करके उ गाउँपालिकामे रहल सिकलसेल ओ थालासेमियाके बिरामीके स्वास्थ्य परीक्षण करल हो ।
कार्यक्रममे बिरामीके स्वास्थ्यमे परल असर, ओइनके पोषण स्थितिके अवस्था लगायतबारे जाँच हुइल कैलारी गाउँपालिकाका स्वास्थ्य शाखा प्रमुख वीरेन्द्र सापकोटा जानकारी डेलै ।
सिकलसेल एनिमियाके बिरामीबारे अनुसन्धान कैना उद्देश्यसे आयोजना करल शिविरमे स्वास्थ्य सम्बन्धी जानकारीफे कराइल रहे । सेती प्रादेशिक अस्पतालके चिकित्सक डा. प्रदीप मिश्रसहितके स्वास्थ्यकर्मीके टोली सिकलसेल बिरामीके स्वास्थ्य अवस्थाबारे चेकजाँच ओ अनुसन्धान करल रहे ।
कार्यक्रममे कैलारी गाउँपालिकाके अध्यक्ष लाजुराम चौधरीके अध्यक्षतामे हुइल कार्यक्रममे उपाध्यक्ष लक्ष्मी सत्गौवां, सुदूरपश्चिम प्रादेशिक स्वास्थ्य निर्देशनालयके निर्देशक डा. जगदीश जोशी, गाउँपालिकाके प्रमुख प्रशासकीय अधिकृत वीरबहादुर ऐर, वडा अध्यक्षहुक्रे, गाउँपालिकाके कर्मचारी, स्वास्थ्यकर्मी, सिकलसेल एनिमियाके बिरामी लगायतके उपस्थिति रहल रहे ।
कैलारी गाउँपालिकामे एक सयसे ढेर सिकलसेल एनिमिया पीडित व्यक्ति रहल गाउँपालिकाके स्वास्थ्य शाखा जानकारी डेले बा । सिकलसेल एनिमिया परीक्षणके लाग गाउँपालिकामे चार/पाँच ठो स्वास्थ्य परीक्षण शिविरके आयोजना करल सापकोटा जनैलै ।
