सुदूरपश्चिमके सक्कु जिल्लामे पुगल मतपत्र

पहुरा समाचारदाता
धनगढी, १९ वैशाख । इहे वैशाख ३० गते हुइना स्थानीय तह निर्वाचनके लाग सुदूरपश्चिमके सक्कु जिल्लामे मतपत्र ढुवानी करल बा ।

प्रदेश निर्वाचन कार्यालय धनगढीसे सुदूरपश्चिमके नौं जिल्लामे मतपत्र ढुवानी होसेकल जनाइल बा । निर्वाचन आयोगसे वैशाख १३ गतेसे मतपत्र ढुवानी सुरु करल रहे ।

नौं जिल्लाके सदरमुकाममे स्थापना करल मुख्य निर्वाचन अधिकृतके कार्यालयमे मतपत्र पुगसेकल प्रदेश निर्वाचन कार्यालयके प्रमुख प्रेम भट्ट जानकारी डेलै । ‘मुख्य निर्वाचन अधिकृतके कार्यालयमे मतदानके सामाग्री पुगाइल बा,’उहाँ कहलै, ‘आब मतदान अधिकृतके तालिमपाछे निर्वाचनके सामाग्री मतदान केन्द्रमे पठाजैना बा ।’

कैलालीके सुगरखालमे भर हेलिकोप्टरमार्फत मतदानके सामाग्री पठैना तयारी रहल निर्वाचन कार्यालय जनैले बा । ओस्टके सुदुरपश्चिमके अन्य विकट क्षेत्रमे फेन मतदानमे खटजैना कर्मचारी ओ मतदानके सामग्री हेलिकोप्टरमार्फत पठैना तयारी हुइल निर्वाचन अधिकृतके कार्यालय जनैले बा ।

#स्थानीय निर्वाचन