गाउँपालिका अध्यक्षसे बाढ प्रभावित÷विस्थापित क्षेत्रके अनुगमन

पहुरा समाचारदाता
हसुलिया, ५ कुवाँर । कैलारी गाउँपालिकाके अध्यक्ष राजसमझ चौधरी बाढ प्रभावित÷विस्थापित क्षेत्रके अनुगमन करले बटै ।

यिहे कुवाँर १ गते आइल बाढसे विस्थापित वडा–५ स्थित पुरान मन्कापुर, बन्दरगौरही, सपना मुक्तकमैया शिविर, लौवा मन्कापुरके अध्यक्ष लगायतके टोलीसे मंगरके रोज स्थलगत अनुगमन करल हो । कैलारी गाउँपालिकाके टमान वडामे करिब ८ सय घरधुरी बाढसे प्रभावित हुइल बटै कलेसे पुरान मन्कापुर ओ बन्दरगौरहीबासी विस्थापित हुइल बटै । बाढके विस्थापित क्षेत्रके स्थलगत अनुगमन करटी गाउँपालिका अध्यक्ष राजसमझ चौधरी बाढके प्रभावित÷विस्थापितहुकनके गाउँपालिकासे तत्काल डेहे सेक्ना राहत डेहल ओ दिगो व्यवस्थापनके लाग पहल हुइटी रहल बटैलै ।

कैलारी गाउँपालिका–५ बन्दरगौरहीके ४२ घर विस्थापित हुके पवेरा सामुदायिक वनमे त्रिपाल टाँगके बैठल वडा नम्बर ५ के वडा अध्यक्ष विष्णु प्रसाद चौधरी बटैलै । बाढके प्रभावित÷विस्थापित क्षेत्रके अनुगमन कार्यक्रम कार्यक्रममे कैलारी गाउँपालिकाके महिला तथा बालबालिका शाखा प्रमुख बालकुमारी चौधरी, वडा सदस्य पार्वतीदेवी विक, ओरेक नेपालके जिल्ला संयोजक विनु राना, राष्ट्रिय महिला मानव अधिकार रक्षक संजालके जिल्ला अध्यक्ष अम्बिका भण्डारी, तरङगिनी फाउण्डेशनके फिल्ड अफिसर सरिता चौधरी, राष्ट्रिय महिला मानव अधिकार रक्षक संजालके जिल्ला सचिव मिना चौधरीलगायत सहभागिता रहे ।