वरिस्ठ साहित्यकार श्रेष्ठ प्रिया पत्थर सम्मानित

पहुरा समाचारदाता
धनगढी, १७ अगहन । नेपाली साहित्य जगतके ढुरखम्भा बरिस्ठ साहित्यकार श्रेष्ठ प्रिया पत्थर सम्मानित हुइल बटैं ।

नेपाली वाङमय साधना सम्मान २०७६ से उहाँ सम्मानित हुइल हुइँट् । साहित्यकार पुष्करराज भट्टसे स्थापना करल उ पुरस्कार नेपाली वाङमय परिषद धनगढीके आयोजनामे हुइल एक कार्यक्रम कैके सम्मान कैगैल बा । पुरस्कारके राशी नगद १० हजार ओ प्रमाणपत्र बा ।

साहित्यिक क्षेत्रमे ढेर योगदान करल साहित्यकार ओइनहे इ पुरस्कार हरेक साल एक जहन छनौट कैके डेटी आइल आयोजक जनाइल ।

श्रेष्ठ प्रिया पत्थर नेपाली साहित्यमे निरन्तर कलम चलैटी रहल साहित्यकार हुइटैं । उहाँ गजल, उपन्यास, मुक्तक, कथा, लघुकथा, कविता लगायत टमान विधामे सक्रिय होके कलम चलैटी आइल बटैं ।