विपतपुर आगलागी पीडितके घर निर्माण सुरु

पहुरा समाचारदाता
हसुलिया, ९ पुस । कैलालीके कैलारी गाउँपालिका–७ विपतपुर मुक्तकमैया बस्तीमे सुरक्षित आवास घरके शिलन्यास हुइल बा ।
कैलारी गाउँपालिकाके पहलमे सुदूरपश्चिम प्रदेशके भुमि व्यवस्था तथा कृषि मन्त्रालयके आर्थिक सहयोग, हयाविटयाट नेपाल, आरडीएनके प्राविधिक सहयोगमे बने लागल आगलागी पीडित परिवार २७ घर निर्माणके शिलान्यास सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्री विनिता चौधरी करले रहिट ।

शिलान्यास कार्यक्रममे बोल्टी उहाँ प्रदेश सरकार, संघ संस्थाके लगानी घर निर्माण कार्य सुरुवाट हुइल मने जेकर घर बन्टी बा ओइनेफे चासोके साथ लग्ना ओ सहयोग जरुरी बटैली । मन्त्री चौधरी कहली, ‘प्रदेश सरकारसे यी बस्तीमे आगलागिसे पीडित मुक्तकमैयनके घर बनैना पहिलेसे कहले रहे, ढिलाई हुइलेसेफे अब्बे सुरुवाट करल बा । घर नइरहल मुक्तकमैयनके लाग सुरक्षित आवास गृह बनैना प्रदेश सरकार नीति रहे, यहाँ आगलागि हुइलपाछे आवश्यकताहे मध्ये नजर करके काम आघे बह्राइल हो ।’

कैलाली क्षेत्र नम्बर ३ ‘क’ के निवर्तमान प्रदेशसभा सभा सदस्य विरमान चौधरी प्रदेश सरकारके सहयोगमे घर बन्ना सकारात्मक बाट रहल बटैलै । उहाँ कहलै, ‘परियोजनासे सुरु करल सुरक्षित आवास घर निर्माण नइओराइटसम स्थानीयहुक्रे रोजगारीफे पैही, घर निर्माणके काम सेकलपाछे घर पैही ।’ उपभोक्ता समिति मार्फत बन्ना सुरक्षित आवास घर निर्माणके लाग मिस्त्री, मजदुरके रुपमे यिहेक स्थानीय काम पैना उहाँ बटैलै ।

कैलारी गाउँपालिकाके प्रवक्ता तथा वडा–७ के अध्यक्ष दिपेन्द्रबहादुर बम आगलागि पीडितहुकनके घर प्रतिनिधिसभा सदस्य ओ प्रदेशसभा सदस्य निर्वाचन आघे बने पक्का हुइल मने प्राविधिक कारण ढिलाई उहाँ बटैलै । उहाँ कहलै, ‘आगलागीसे क्षति हुइल घर निर्माणके लाग घर नक्सा, घरके मोडल तयार ओ जग्गा नापजोख हुसेकल रहे । मापदण्डके लाग नक्सा गाउँपालिकासे पास कराई पर्ना बाँकी रहे । निर्माणके लाग और कागजी प्रक्रिय पुरा हुसेकल बेला निर्वाचन आचासहिताके कारण ढिला हुइल हो । यकर शिलान्यासके काम हुइल बा । आब काम निन्तर बह्रैना जरुरी बा ।’

गैल बैशाख ११ गते भीषण आगलागीहुके विपतपुर मुक्तकमैया बस्तीके २७ पूर्णरुपसे क्षति हुइल रहे । आगलागि पीडितहुकनके घर प्रतिनिधिसभा सदस्य ओ प्रदेशसभा सदस्य निर्वाचन आघे निर्माण सुरु कैना पक्का हुइल रहे मने, निर्वाचन आचारसहिता लागु हुइल कारण आघे बह्रे नइसेक्के रहे ।

विपतपुर मुक्तकमैया बस्तीके भल्मन्सा हिंगुराम चौधरी आगलागी हुइलपाछे नौ महिनासम शितघाममे दिनरात विताई पर्ना बाध्यता रहल बटैलै । उहाँ कहलै, नेपाल रेडक्रस सोसाइटी बनाइल त्रिपालके घरमे आबसे शितपानीफे चुनाहा हुगिल बा । सुरक्षित आवास घर हाली बन्लेसे आगलागी पीडितहे सहजुल हुई ।’

हयाविटयाट नेपालके परियोजना प्रबन्धक पुनिता चौधरी आगलागी पीडित मुक्तकमैयाके २७ घर जेठसम निर्माण सम्पन्न कैसेक्ना लक्ष्यके साथ आघे बह्रल बटैली । उहाँ कहली, घर निर्माणके बेला कौनो विपद, बाधा व्यवधान नइआई, स्थानीयहुकनके निरन्तर साथ सहयोग हुई कलेसे अइना बैशाखसम बनासेक्ना कहल बा । ढिला हुई कलेसे जेठसम ओरुवइना योजना बा ।

हयाविटयाट नेपालके कार्यक्रम अधिकृत राममनि चौधरी निर्माण हुइटी रहल घरमे दुई ठो कोठा, बरण्डा, ओम्ने जोरल एक ठो भन्सासहित ओ चर्पी रहना बा । कोठाके साइज १० वाई १२ रहना बा । घरके वाल पीभिसी व्लक ओ उप्पर जस्तापाता रहना उहाँ जनैलै ।

कैलारी गाउँपालिका विपतपुर आगलागी पीडित २७ मुक्तकमैया घर परिवारके लाग १ करोड ८५ लाख ९९ हजार ९८५ रुप्या बजेट विनियोजन करके काम आघे बह्राइल हयाविटयाट नेपालके प्रोजेक्ट इन्जिनियर अनुजराज जोशी बटैलै ।
उहाँ कहलै, यी बजेट मन्से ९० लाख नेपाल सरकारके, ५४ लाख हयाविटयाट नेपालके ओ ४२ लाख समुदायके कन्ट्रीबुसन रही । यकर निर्माण अवधि लक्ष्य २०८० जेठसम कैगिल बा ।’

ओस्टेक सुरक्षित आवास घर शिलान्यास उदघाटन कार्यक्रम सुदूरपश्चिम प्रदेश भुमि व्यवस्था कृषि तथा सहकारी मन्त्रालयके सचिव डा. मदनसिंह धामीके अध्यक्षतामे हुइल रहे । कार्यक्रममे संचालन धर्मराज ओझा करले रहिट । कार्यक्रममे आरडिएनके प्रतिनिधि मोहन वड, लाभग्राही समुदायके अध्यक्ष हरिप्रसाद चौधरी लगागत मन्तव्य व्यक्त करल रहिट ।