‘खाद्य अधिकार सुनिश्चित कैना स्थानीय सरकारके दायित्व हो’
पहुरा समाचारदाता
हसुलिया, १२ पुस । खाद्य अधिकार प्रवद्र्धनमे स्थानीय सरकारके भुमिका विषयक अन्तरक्रिया कार्यक्रम सोम्मारके रोज हसुलियामे हुइल बा ।
फियान नेपालके आयोजनामे हुइल कार्यक्रमके वडका पहुना कैलारी गाउँपालिकाके अध्यक्ष राजसमझ चौधरी रहल रहिट । कार्यक्रममे उहाँ गाउँपालिकासे किसानहुकनके बर्गिकरण करके किसान परिचयपत्र डेना योजना रहल बटैलै ।
कैलारी गाउँपालिका बाढ प्रकोपसे ग्रसित ठाउँ रहल ओरसे यहाँ उत्पादन हुइल खाद्य बस्तु बाढके कटान ओ डुबानसे नष्ट हुइल बटैलै । उहाँ कहलै, उत्पादनके दृष्टिकोणसे कैलारी गाउँपालिका मजा बा, मने डुबान, कटानके कारण खेती योग्य जमिन मरुभुमिकरण हुइना अवस्थामे बा ।
कार्यक्रममे गाउँपालिका उपाध्यक्ष भगवतीकुमारी चौधरी यहाँ बाढ प्रकोपके कारण खेती योग्य जमिनमे क्षयकरण हुइल बटैलै । उहाँ गाउँपालिकामे खाद्य बैंक बनैना जरुरी रहल बटैली । सीमात्कृत वर्ग समुदायके खाद्य अधिकार सुनिश्चित करे लाग फियान नेपालसे आघे बह्रना तयार रहलफे उहाँ प्रतिवद्धता जनैली ।
प्रमुख प्रशासकीय अधिकृत विरबहादुर ऐर गाउँपालिकासे कानूनी मापडण्ड अपनाके खाद्य अधिकार तथा खाद्य सम्प्रभुता सम्बन्धी समिति बनाके आघे बह्रना जरुरी रहल बटैलै । मौसम परिवर्तनके उत्पादनमे ह्रास हुइलफे उहाँ बटैलै ।
कार्यक्रममे सामाजिक विकास अधिकृत यगम कलेसे गाउँपालिकासे किसानहुकन सुचिकृतके लाग बजेट विनियोजना करल बटैलै ।
खाद्य अधिकार प्रवद्र्धनमे स्थानीय सरकारके भुमिका विषयक अन्तरक्रिया कार्यक्रममे फियान नेपालके सुदूरपश्चिम प्रदेश प्रमुख मुकुन्द राना, अधिवक्ता तिलक अधिकारी खाद्य ऐन कार्यान्वयनमे स्थानीय सरकारके पहल, खाद्य अधिकार प्रवद्र्धन, खाद्य अधिकार तथा खाद्य सम्प्रभुता सम्बन्धी ऐन २०७५ कार्यान्वयनमे स्थानीय सरकारके भूमिका विषयबारे प्रस्तुतीकरण करल रहिट । फियान नेपालके कार्य समिति सदस्य राजकुमार शुक्लाके अध्यक्षतामे हुइल कार्यक्रममे गाउँपालिका वडा अध्यक्ष, टमान शाखाके प्रमुखहुकनके सहभागिता रहे ।
