व्याडमिन्टन, भलिवल, महिला फुटवल खेल फाइनल क्रिकेट ओ पुरुष फुटवलके फाइनल खेल शनिच्चरके रोज

पहुरा समाचारदाता
हसुलिया, २२ पुस । कैलालीके कैलारी गाउँपालिकामे जारी चौठा अध्यक्ष रनिङ कप अन्र्तगतके तीन खेल फाइनल हुइल बा । कलेसे क्रिकेट ओ पुरुष फुटवलके फाइनल खेल शनिच्चरके रोज हुइना बा ।

कैलारी गाउँपालिकाके आर्थिक सहयोग तथा कैलारी युथस युनाईटेड क्लवके आयोजनामे यिहे पुस १५ गतेसे हुइटी रहल गाउँपालिका स्तरीय अध्यक्ष कपमे आजसम व्याडमिन्टन, भलिवल, महिला फुटवल खेल फाइनल हुइल बा ।
उ प्रतियोगिता अन्र्तगत व्याडमिन्टन खेलमे वडा नम्बर १, भलिवल खेलमे वडा नम्बर ७ ओ महिला फुटवल खेल ओरसे वडा नम्बर २ फाइनल खेलमे विजयी हुइल कैलारी युथस युनाईटेड क्लवके वरिष्ठ सल्लाहकार श्रीराम चौधरी बटैलै ।

महिला फुटवल खेलओरसे शुकके रोज हुइल फाइनल खेलमे वडा नम्बर २ ओ वडा नम्बर ६ विच प्रतिस्पर्धा हुइल रहे । जेम्ने वडा नम्बर २ से वडा नम्बर ६ हे दुई गोल मारके विजयी हुइल बा । वडा नम्बर ६ गोल मारे नइसेक्के दुसर स्थानमे चित्त बुझैले बा ।

उ प्रतियोगिता अन्र्तगतके शनिच्चरके पुरुष फुटवल ओ क्रिकेट खेल फाइनल खेल खेल्ना बा । पुरुष फुटवलके फाइनल खेल वडा नम्बर ६ ओ ३ विच प्रतिस्पर्धा हुइना बा । कलेसे क्रिकेट खेल वडा नम्बर ९ ओ २ विच प्रतिपर्धा हुइना आयोजक क्लवके बरिष्ठ सल्लाहकार संयोजक बटैलै । प्रतियोगिता कैलारी गाउँपालिका–३ स्थित यौङ व्वाइज क्लवके खेल मैदानमे हुइटी बा । क्रिकेट भर कैलारी–७ बसन्ताके खेल मैदानमे हुइटी रहल बा ।

गाउँपालिका स्तरीय अध्यक्ष रनिङ कपमे पुरुष ओ महिला फुटवलके पहिल हुइना टिमहे एक लाख नगद प्रमाणपत्र, मेडल ओ ट्रफी पैही । दुसर टिम ५० हजार नगद प्रमाणपत्र, मेडल ओ ट्रफी पैही । ओस्टेक करके उत्कृष्ट खेलाडी, सर्वाधिक गोलकर्ता, उत्कृष्ट गोल रक्षक ओ उदयमान खेलाडी ३÷३ हजार नगद रुप्या प्रमाणपत्र, मेडल ओ ट्रफी पैही ।

प्रतियोगिताके पुरुष भलिवलके पहिल विजेता ५० हजार नगद रुप्या, प्रमाणपत्र, मेडल ओ ट्रफी दुसरा टिमहे २५ हजार, उत्कृष्ट खेलाडी ३ हजार नगद रुप्या प्रमाणपत्र, मेडल ओ ट्रफी पैना आयोजक जनैले बा । पुरुष व्याडमिन्टनहे पहिल राशी २० हजार, दुसराहे १० हजार नगद रुप्या ओ प्रमाणपत्र, मेडल ओ ट्रफी पैही । ओस्टेक करके पुरुष क्रिकेटमे पहिल राशी २० हजार, दुसराहे १० हजार प्रमाणपत्र, मेडल ओ ट्रफीके व्यवस्था रहल आयोजक जनैले बा ।