कैलारी–५ मे स्तनपान कक्ष संचालन

महिला स्वास्थ्य स्वयंसेविकाहुकन सम्मान स्वरुप थरमस ओ हटकेस वितरण

पहुरा समाचारदाता
हसुलिया, १९ अगहन । कैलाली जिल्लाके कैलारी गाउँपालिका वडा नम्बर ५ मे आजसे स्तनपान कक्षके संचालनमे आइल बा कलेसे २० औं राष्ट्रिय महिला सामुदायिक स्वास्थ्य स्वयंसेविका दिवसके अवसर पारके वडा नम्बर ५ के सक्कु महिला स्वास्थ्य स्वयंसेविकाहुकनहे सम्मान स्वरुप थरमस ओ हटकेस वितरण बा ।

कैलारी गाउँपालिका वडा नम्बर ५ वडा अध्यक्ष विष्णु प्रसाद चौधरीके अध्यक्षतामे हुइल कार्यक्रमके वडका पहुना तथा गाउँपालिका उपाध्यक्ष भगवतीकुमारी चौधरी एक कार्यक्रमके विच प्रारम्भिक वाल सिकाई ओ स्तनपान कक्षके उदघाटन करल रहिट ।

स्तनपान कक्षके उदघाटन कार्यक्रममे बोल्टी वडा कार्यालय ओ स्वास्थ्य चौकीमे सेवा लेहे अउइयाहे सहजुल हुइना बटैली । उहाँ कहली, सेवा कोई कोई महिला सेवा लेहक लाग लर्कन नाने पर्ना बाध्यक्षता रहठ । स्तनपान कक्ष नइहुके दुध खवैना कर्रा रहठ । यी वडामे स्थापना हुइलपाछे आब सहजुल हुई ।’

स्तनपान कक्षमे दुधे बालबालिकाहे दुध खवैना संगे छोट लर्कन खेल्ना मजा हुइलफे उहाँ बटैलै । कैलारी गाउँपालिका वडा नम्बर २ ओ ४ मेफे स्तनपान कक्ष स्थापना हुसेकल उपाध्यक्ष बटैली । कार्यक्रममे कैलारी गाउँपालिका स्वास्थ्य शाखा प्रमुख नरेशकुमार चौधरी, वडा सदस्य अनारकली चौधरीलगायत मन्तव्य व्यक्त करल रहिट ।

ओस्टेक २० औं राष्ट्रिय महिला सामुदायिक स्वास्थ्य स्वयंसेविका दिवसके अवसर पारके वडा नम्बर ५ मे रहल २० जाने महिला स्वास्थ्य स्वयंसेविकाहुकन सम्मान स्वरुप थरमस ओ हटकेस वितरण कैगिल बा । कार्यक्रमके संचालन कुसुम चौधरी ओ स्वागत मन्तव्य महिला स्वास्थ्य सेविका सुशिला चौधरी करल रहिट । कार्यक्रममे कार्यपालिका सदस्य, वडा सदस्य, सेतो गुराँस राष्ट्रिय बाल विकास कैलारी गाउँपालिका सहजकर्ता सुरज परियारलगायतके सहभागिता रहल रहे ।

हरेक वर्ष डिसेम्बर ५ के दिन अन्तर्राष्ट्रिय स्वयंसेवक दिवसके अवसर पारके नेपालमे मनैटी आइल राष्ट्रिय महिला सामुदायिक स्वास्थ्य स्वयंसेविका दिवसके २० औं संस्करण मंगरके रोज अगहन १९ गते (तदअनुसार डिसेम्बर ५, २०२३) के दिन “स्वास्थ्य क्षेत्रमे दिगो विकासः महिला सामुदायिक स्वास्थ्य स्वयंसेविकाके संयुक्त प्रयास” कना मुल नाराके साथ देशभर मनजैटी बा ।