नगरपालिकाके पहिल काम फोहरमैला व्यवस्थापन होः नगरप्रमुख हमाल
पहुरा समाचारदाता
धनगढी, ५ पुस । धनगढी उपमहानगरपालिकाके नगर प्रमुख गोपाल हमाल नगरपालिकाके पहिल काम फोहरमैला व्यवस्थापन रहल बटैले बटै ।
यूएनडिपीके आर्थिक सहयोगमे पिसविनसे धनगढी उपमहानगरपालिका–२ मे रहल शुक्ष्म वर्गीकरण केन्द्रहे फोहर व्यवस्थापन कार्यमे प्रयोग हुइना गाडी तथा उपकरण हस्तान्तरण कार्यक्रममे नगर प्रमुख फोहर व्यवस्थापन कैना पहिल काम रहल बटैलै ।
फोहोर व्यवस्थापन पहिल काम हो,’ नगर प्रमुख हमाल कहलै, ‘विस्राई नइपरल, मने हम्रे कबु् कबु भटके हास लागठ । हम्रे आसेकलपाछे फोहरहे एक ठाउँसे दुसर ठाउँ सर्ना काम होए, दिगो व्यवस्थापन हुइल नइरहे ।’
धनगढीमे प्रत्येक घरसे उत्पादन हुइना फोहर मैला हम्रे बर्गिकरण कैना कहले बटी उ महत्वपूर्ण हो । दिर्घकालिन रुपमे यकर समाधान करे परठ कना हम्रे लागल बाटी नगर प्रमुख हमाल कहलै ।
फोहर मैला व्यवस्थापन करे परठ कना बानी बैठैना सबसे जरुरी बा,’ उहाँ कहलै, व्यक्तिके बानी नइसपारटसम उपमहानगरपालिका जटरा काम करलेसे कुछ नइहुई । विद्यालयमे अब्बे फोहर बर्गिकरण कैसिक करे परठ कहिके सिखैटी बटी । अइना बरससे प्रतियोगिताफे कैबी । प्रतियोगितासे प्रतिभाके प्रस्फुटन हुईठ । एक ठो विद्यालयहे पाँच मिटरसम सरसफाईसंग्गे समुदायके जनचेतना जिम्मा लगाइक लाग बटी ।’
मेयर हमाल कहलै, ‘क्लवमे, समुदायमे सरसफाई समिति गठन करके प्रतिस्पर्धा करैबी । जे पहिल हुइल उहीहे संस्थाके माग अनुसार योजना नन्ना प्राविधिक रुपमे अध्ययन करटी ।
समुदायमे संकलन हुके आइल फोहर मैलाहे बर्गिकरण करके मोहरमे परिवर्तन कैना ओर लागल उहाँ बटैलै । संकलन हुइल बस्तु बर्गिकरण करटी प्रत्येक महिना बेचना निर्णय करसेकल बटी उहाँ कहलै ।
हम्रे जग्गा नइपाके काम रुकल रहे । अब्बे जग्गा पाके काम आघे बह्रल बा । यी भाडाके जग्गा हो । अस्पतालसे उत्पादन हुइना फोहरफे व्यवस्थापन कैना उहाँ बटैलै । नगरपालिकाहे छेगरा, मुर्गीके भुटला व्यवस्था कैना कर्रा रहल बटैलै ।
संकलन फोहरमे फेरसे प्रयोग करे मिल्ना लस्री, कुर्सी, बाल्टी बनाई सेक्लेसे पूर्ण रुपमे सार्थकता पैनाफे बटैलै ।
यूएनडिपीके आर्थिक सहयोगमे पिसविनसे नगर स्तरीय फोहर व्यवस्था परियोजना मार्फत फोहर व्यवस्थापनके लाग मिनि ट्रक, बेलिङ मेसिन, सेलिङ मेसिन ओ धनगढी उपमहानगरपालिका शुक्ष्म वर्गिकरण केन्द्रमे कार्यरत रहल कामदारहुकनहे तोट व्याग, टिसर्ट, डायरी, टोपी, पानी बोटल करके जम्मा ७७ लाख ९५ हजार ३१० रुप्या बराबरके सामान हस्तान्तरण कैगिल बा ।
उ सामान हस्तान्तरण पत्रमे यूएनडिपीके ओरसे प्रोजेक्ट मेनेजर राजेश बर्मा ओ उपहानगरपालिकाके ओरसे नगर प्रमुख गोपाल हमाल हस्ताक्षर करटी सामान धनगढी उपमहानगरपालिका शुक्ष्म वर्गीकरण केन्द्रहे हस्तान्तरण कैगिल बा । कार्यक्रम समापन धनगढी उपमहानगरपालिकाके उपप्रमुख कन्दकला राना करले रहिट ।
कार्यक्रम उहाँ धनगढी उपमहानगरपालिकासे सुरुवात करल फोहोरमैला व्यवस्थापनमे सक्कहुनके सहयोग अपरिहार्य रहल बटैलैं ।
