लागु औषध दुव्र्यशन विरुद्ध बालअधिकार चेतना समुह

पहुरा समाचारदाता
कञ्चनपुर, २४ पुस । बाल अधिकार चेतना समूहके सडक नाटक टोलीसे लागु औषध दुव्र्यशनीसे समाजमे परटी रहल असर ओ न्यूनिकरणमे सरोकारवालाहुकनके भूमिका विषयमे सडक नाटक तयार पारके लालझाडी गाउँपालिकामे प्रदर्शन करले बा ।

अनौपचारिक क्षेत्र सेवा केन्द्र (इन्सेक) से लालझाडी गाउँपालिका–२ शंकरपुरस्थित भानु माध्यमिक विद्यालयमे गठित बाल अधिकार चेतना समूहसे सचेतनामुलक नाटक प्रदर्शन करल हो । मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहले सडक नाटक प्रदर्शन करल इन्सेक कञ्चनपुरके जिल्ला प्रतिनिधि कैलाश पनेरु बटैलै ।

सडक नाटक प्रदर्शनमे शिक्षक, बिद्यार्थी, अभिभावक, मानबअधिकार समुहके सदस्यलगायत सयौंके संख्यामे स्थानीयहुकनके उपस्थिति रहल रहे । सडक नाटक प्रदर्शन कार्यक्रममे बालबालिकाहु्क्रे लागुऔषध दुव्र्यशनीसे समाजमे परटी रहल नकरात्मक असर ओ रोकथामके लाग सरोकारवालाहुकनके भूमिका झल्कैना प्रयास करल रहे ।

मानबअधिकार समुह लालझाडीके संयोजक सोमनाथ राना पछिल्का समयमे लालझाडी गाउँपालिका लागुऔषध ओसार पसार तथा सेवन करुइयाके ट्रान्जीट प्वाईन्ट बन्टी गैल आोरसे यैसिन खाले नाटकसे समाजमे सकरात्मक सन्देस प्रबाह करलमे बालअधिकार चेतना समुहहे धन्यवाद ज्ञापन करलै । १२ जाने पात्र रहल सडक नाटकमे बालबालिका, विद्यालय, शिक्षक, वडाअध्यक्ष, स्थानीय मदिरा व्यापारी, मदिरा सेवन करटी रहल संघरीया, प्रहरी लगायतके लागु औषध दुव्र्यशनी न्यूनीकरणमे हुई सेक्ना भूमिका झल्कन खालके कथा प्रस्तुत करल रहे ।