लागु औषध दुर्व्यशनी न्यूनीकरणमे भूमिका रहीः प्रहरी प्रमुख विष्ट
पहुरा समाचारदाता
धनगढी, ११ फागुन । जिल्ला प्रहरी कार्यालय कैलालीके प्रहरी प्रमुख पदमबहादुर विष्ट लागु औषध दुर्व्यशनीके घटना ह्वटे बह्रल कहटी उहीहे न्युनिकरण कैना भूमिका रहना बटैले बटै ।
भर्खर जिल्ला प्रहरी कार्यालय कैलालीके प्रमुखमे सरुवा हुके आइल उहाँ विफेक रोज संचारकर्मीहुकनसंग भेटघाट तथा परिचयात्मक कार्यक्रमे उहाँ उ जानकारी डेहल हुइट ।
प्रहरी प्रमुख विष्ट कहलै, ‘मै भर्खर सरुवाहुके कैलाली आइलपाछे सबसे ढेर समस्या अवैध लागु औषध ओ फरार प्रतिवादीके पैनु । लागु पूर्ण रुपमे रोके नइसेक्लेसेफे उहीहे न्यूनिकरण कैना महत्वपूर्ण भुमिका रही ।’ लागु औषध अइना कहलेक भारतसे हो,’ उहाँ कहलै, ‘मुल जार फोहर रहठ कलेसे तरे जटरा सफा करलेसे पानी धुमिल अइटी रना कहटी यकर लाग भारतीय प्रहरी प्रशासनसे छलफल कैना जरुरी बा । भारतमे पाँच ग्राम लागु औषध बोक्लेसे प्रहरी खासे पक्राउ नइकैना करल कारण भारतसे नेपालीहुक्रे सहजुले नेपाल नन्टी रहल बटै । यकर लाग हम्रे भारतसे छलफल करब । ’
भारतसे पाँच ग्राम लागु औषध बोक्लेसे पक्राउ नइकरना, पाँच ग्रामसे १० ग्राम बा कलेसे पक्राउ कैना मने हल्का फुल्का जरिवाना धरौती धारके छोरना करल बा । मने नेपालमे मिलिग्राममे मुद्दा चलठ ।
लागु औषध दुव्र्यशनीके विकृति बजार हुइटी गाउँभरमे फैले लागल बा । यहाँसम हिमाली जिल्लामेफे डेखा परे लागल प्रहरी प्रमुख विष्ट कहलै ।
