मानव अधिकार रक्षक सहायता कक्ष रकम फ्रिज नइहुइना मेरिक बनैनामे जोड
पहुरा समाचारदाता
धनगढी, ७ बैशाख । मानव अधिकार रक्षकहुक्रन हिंसा व आपतविपतके बेला प्रदान कैना रकमहे फ्रिज नइहुइना मेरिक बनैना मानव अधिकार रक्षक संजालके प्रतिनिधिहुक्रे बटैले बटैले बा ।
इन्सेक सुदूरपश्चिम प्रदेशके आयोजना तथा डिसिएके सहयोगमे मानव अधिकार सहायता कक्ष सवलीकरण विषयक छलफल कार्यक्रममे मानव अधिकार रक्षक संजालके प्रतिनिधिहुक्रे उ बाटमे जोड डेहल रहिट । इन्सेक प्रदेश संयोजक खडकराज जोशी मानव अधिकार रक्षकहुक्रे मानव अधिकारके क्षेत्रमे काम करटी रहल कौनो बेला जोखिममे परे सेक्ठै । यी सहायता कक्ष स्थापना ओइनके लाग कैगिल हो । कौनो बेला लक्ष्यसे तथ्याङक आइसेकठ । कबु ढेर उ कम आइल बेला पैसा बचे सेकठ । बचल पैसाहे बास्केट बलके रुपमे धारे सेक्लेसे मजा हुइना बटैलै । हिंसा पीडितहे कबु कबु छोट सहयोगसे भारी राहत पुग्ना उहाँ बटैलै ।
डिसिएके सूर्य कुमारी विश्वकर्मा प्रभावितहुक्रे हिंसामे परलपाछे न्यायलयसम पुग्ना पैसाफे रहे नइसेकठ । ओइने आर्थिक नइहुके कौनोफे ठाउँ अइना जैना समस्या हुई सेकठ । उ बेला सहयोग करेलेसे न्यायलयके ढोकासम पुग्ना सहजुल हुइना बटैली । प्रभावितहुक्रे यी बरष कम अइलेसे बचल पैसा एक फन्डके रुपमे धारे सेक्लेसे मजा हुइना उहाँ बटैली ।
मानव अधिकार सहायता कक्षके संयोजक देवी प्रसाद खनाल यी बरस दुइ जनहनहे सहयोग करल बटैलै । सहायता कक्षसे १८ जनहनसम सहयोग करे सेक्ना अवस्था रहे । यी बरष कम जाने सम्पर्कमे आइल ओरसे बचल पैसा बास्केट वलके रुपमे धारे सेक्लेसे दुसर बरसके लाग काम लग्ना बटैलै ।
सावित्रा घिमिरे मानव अधिकार सहायता कक्षहे प्रभावकारी बनैना सक्कु जानेक भूमिका रहना बटैली । उहाँ मानव अधिकार रक्षकहुकनके चुनौती अभिलेखीकरण कैना आवश्यक रहल बटैली ।
हरिलाल चौधरी पीडितहुकनके लाग काम करटी रहल यी सहायता कक्ष महत्वपूर्ण रहल मने कौनो बरस कम खर्च हुइलेसे फ्रिज नइजैना मेरिक धारे सेक्ना बनाई पर्नामे जोड डेलै ।
गीता चौधरीफे सहायता कक्षाके बचल पैसा इमरजेन्सी कोषके रुपमे धारे पर्ना बटैली । उहाँ मानव अधिकार रक्षक कौनो बेला घाहिल, अशक्त हुइलबेला उपचार खर्चके रुपमे सहयोग हुइल बा । उ मजा पक्ष रहल बटैली ।
हरि जोशी संचारकर्मीहुक्रे समाचार लिखलके भर टमान ओर धम्की अइना ओ उप्पर प्रेस काउन्सिलसेफे कार्वाही करल बटैलै ।
मानव अधिकार आयोगके गणेश जोशी संचारकर्मीनहे आचारसहिताके बाँधल ओरसे का लिख्ना का नइलिख्ना डेहेपर्ना बटैलै । आयोगमे गम्भीर खाले हिंसामे परल व्यक्ति नइआइल बटैलै ।
