सहयोगके पर्खाइमे गुर्बुराज
पहुरा समाचारदाता
घोडाघोडी, ७ भदौ । घोडाघोडी नगरपालिका–११, तिल्कनीपुरके मुक्त कमैया गुर्बुराज चौधरीके गोर आगीमे परके जरलपाछे उहाँहे बैसाखी तथा ह्विलचेयरके खाँचो परल बा ।
एकठो गोरा काटे परल कारण उहाँहे बैसाखी तथा ह्विलचेयर आवश्यक परल सामाजिक सञ्जालसे सार्वजनिक करल हो । जैसिकटैसिक ऋणधन कैके जरल गोरा काटके उपचार कैलेसे फेन हिँडडुल कैना समस्या रहल चौधरी बटैलै ।
उहाँ कठ्वक बैसाखी बनाके ओक्रे सहारामे हिँडडुल कैटी आयल बाटै । ६८ वर्षीय गुर्बुराज कहठै, ‘बैसाखी ओ ह्विलचेयर किनक लाग पैसा नैहो, अपनहे बनाइल कठ्वक बैसाखीसे काम चलैले बाटु ।
ठोरचे गम्हीर बा ओ डुरसम नेंगे नैसेक्ठु ।’ गुर्बुराजके परिवार दैनिक ज्याला मजदुरीसे गुजारा करटी आइल बा । उहाँक गोरा काटलसँगे ज्याला मजदुरी कैनासमेत कर्रा हुइना करल बा । घोडाघोडी नगरपालिका–१०, पहलमानपुरके एक युवा गुर्बुराजहे आर्थिक सहयोगके लाग सामाजिक सञ्जालसे आह्वान करले बाटै । अपाङ्गता रहलके लाग सरकारसे भत्ताके व्यवस्थाके साथे सहायता सामग्री सहयोग करठ् मने गुर्बुराज भर बैसाखी फेन पाइल नैहुइट ।
वडाध्यक्ष दानसिंह जोगी गुर्बुराज मुक्त कमैया परिवारका अपाङ्गता रहल व्यक्ति जनैटी एक गोर रहल व्यक्ति सहायता सामग्री नैपैना बटैलै ।
उहाँ कहलै,‘गुर्बुराज आब टे बुह्रागैल बाटै, उहाँहे बैसाखी नैहोके ह्विलचेयरके खाँचो रहल बा । सरकार डुनु गोर गुमाइलहे किल सहयोग डेहठ् । गुर्बुराज ओहे होके सरकारसे पैना सुविधा नैपाइल हुइट ।’ दैनिक ज्याला मजदुरी कैके साँझसकारके छाक टर्ना गुर्बुराजहे आर्थिक सहयोगसमेत आवश्यक रहल वडाध्यक्ष जोगी बटैलै ।
