स्वरोजगार ओ आत्मनिर्भर बन्ना विश्वास

पहुरा समाचार
धनगढी, २३ फागुन । धनगढीमे सञ्चालित सीप तथा रोजगार मेलाके तालिममे सहभागि प्रशिक्षार्थीहुक्रे अपनेहुक्रे स्वरोजगार ओ आत्मनिर्भर बन्नामे विश्वास व्यक्त करले बाटै ।

धनगढी उपमहानगरपालिकाके आयोजनामे इहे पागुन ८ गतेसे सीप तथा रोजगार मेलामे सञ्चालित तालिमके प्रशिक्षार्थीहुक्रे ओइसीन विश्वास व्यक्त करल हुइट । ओस्टके सीप तथा रोजगार मेलामे सहभागी होके तालिम लेटी रहल युवाहुक्रे उत्साहित फेन हुइल बाटै । उपमहानगरपालिकासे उहीसे आघे आवद्ध रहल विधामे सीप सिखैटी रहल ओरसे निखारता लानल ओ उहीसे आत्मानिर्भर बनैना फेन विश्वास रहल बा ।

एडभान्स ब्युटिसियनके तालिम लेटी रहल धनगढी उपमहानगरपालिका–५ के आयुशा वाग्ले इच्छा होके फेन सीप सिखे पाइल नैरही मने उपमहानगरपालिकासे सीप तथा रोजगार मेला आयोजना कैना पटा पाइलपाछे फारम भरल रही । छनोटमे परलपाछे अब्बे निःशुल्क तालिम लेटी रहल बाटी ।

रोजगार मेलामा दिनके सिफ्टमे तालिम लेटी रहल वाग्ले एडभान्स तहके तालिम निःशुल्क लेना अवसर पाइबर खुसी लागल बटैटी तालिम प्रभावकारी हुइल सुनैली । ‘हमार जैसिन हाउस वाइफहे जागिर कैना कर्रा रहठ् । ब्युटिसियनमे काम कैना ओ तालिम लेना बरवार इच्छा होके फेन आर्थिक अभावके कारण डिप्लोमा तहके तालिम लेहे नैपाइल रहुँ,’ उहाँ कहली, ‘मने धनगढी उपमहानगरपालिकासे निःशुल्क तालिम डेटी रहल ओरसे बहुट खुसी लागल बा । सिकाइ फेन प्रभावकारी रहल बा । आब यहाँ सिखल सीपहे आपनमे किल सीमित नैराखके औरे जनहनहे फेन सिखैबु ।’

उहाँ अब्बे एडभान्स ब्युटिसियन अन्तरगत नेल ओ मेकअपके तालिम लेटी रहल बाटी ।

धनगढी–४ के लवराज भट्ट फेन रोजगार मेलामे कम्प्युटर हार्डवयर तथा नेटवर्किङसम्बन्धी तालिम लेटी रहल बाटै । दैनिक चार घण्टा तालिम लेटी रहल भट्टहे यहाँ सिखल सीपसे आत्मानिर्भर बनैना विश्वास लागल बा । ‘मै दैनिक चार घण्टा कम्प्युटर हार्डवयर तथा नेटवर्किङसम्बन्धी कक्षा लेटी रहल बाटुँ । हार्डवयर तथा नेटवर्किङसम्बन्धी तालिम लेना इच्छा पूरा हुइल बा,’ भट्ट कहलै, ‘बेरोजगार हुइल कारण फेन सीप सिखके आत्मानिर्भर हुइठु कि कना अपेक्षा फेन हो । आब सीपके माध्यमसे आयआर्जन फेन करे सेकजाइठ् कना लागल बा ।’

डोटीके सुवास बोहरा फेन लेखा व्यवस्थापनसम्बन्धी तालिम लेटी रहल बाटै । धनगढीके ऐश्वर्य बहुमुखी क्याम्पसमे अध्ययनरत बोहरा सैद्धान्तिक रुपमे सिखल चीजहे प्रयोगात्मक कक्षाके माध्यमसे सिख्ना अवसर प्राप्त हुइल बटैलै । ‘तालिमसे आपनहे सक्षम बनैना विश्वास कैटी बोहरा सहजे रोजगारी समेत पैना अपेक्षा करले बाटै । क्याम्पसमे बहुट सैद्धान्दिक चीज पह्रले बाटी । तालिममे प्रयोगात्मक रुपमे सिख्ना अवसर पैले बाटी,’ बोहरा कहलै, ‘सीप सिखलपाछे कौनो फेन संघसंस्थामे काम कैना सजिल हुइठ् । सक्षम हुइबी कना विश्वास करले बाटी ।’

अटोक्याडके तालिम लेटी रहल बझाङके थलारा गाउँपालिका–६ के एलिस चौहान फेन तालिम सिकाइ प्रभावकारी हुइल बटैटी सीप निखारलपाछे सहजे रोजगारी पैना विश्वास करले बाटै । ‘इ तालिममे सहभागी होके प्रभावकारी सिकाइ हुइटी रहल बा । यकरपाछे ज्या फेन करे सेकजाइ । कहोँरो कन्सल्टेन्सी ओर जागिर करे मिली,’ उहाँ कहलै, ‘स्वयंम फेन औरे जनहनहे तालिम डेहे सेकजाइ । आत्मानिर्भर बने पाजाइठ् कि कना विश्वास लागल बा ।’

धनगढीके सिताकुमारी कुँवर ब्युटिसियन सम्बन्धी प्रशिक्षक फेन हुइटी मने उपमहानगरपालिकासे सञ्चालन करल सीप तथा रोजगार मेलामे भर उहाँ प्रशिक्षार्थीके रुपमे सहभागी बाटी ।

खास कैके हेयर कटिङ ओ हेयर डिजाइनिङ सम्बन्धी तालिम लेटी रहल कुँवर सिजरहे अब्बेसम एकठो कैचीके रुपमे किल बुझल मने तालिममे सहभागगी हुइलपाछे ढेर चीज सिख्ना मौका मिलल् बटैली । अपने प्रशिक्षक समेत रहल ओरसे रोजगार मेलामे सिखल चीज औरे जनहनहे फेन सिखैना योजना ओहकान रहल बा ।

‘सिखैना तरिका मजा रहल बा । पहिले औरे ठाउँ फेन सिखल रहुँ मने यहाँ ढेर प्रभावकारी लागल । सिजर एकठो कैची हो कना पता रहे मने अब्बे प्रत्येक चीज सिखल बाटी,’ कुँवर कहली, ‘इ कक्षा नैलेहल रटँ कलेसे अवसर गुम्ना रहे जैसिन लागल बा । मोर अपने ब्युटी पार्लर फेन बा । आब यहाँ सिखल चीज औरे जनहनहे सिखैबु ।’

धनगढी उपमहानगरपालिकाके प्रमुख गोपाल हमाल युवा जनशक्तिहे सीपयुक्त ओ स्वरोजगार बनैना उद्देश्यसे सीप तथा रोजगार मेला आयोजना करल बटैलै । उहाँ बेरोजगार युवाहे सीप सिखैना योजना अन्तरगत सञ्चालन करल मेलाके अवलोकन कैके सुधार करे पर्नामे सुझाव डेना फेन आग्रह करले बाटै ।

‘बेरोजगार युवाहे सीप सिखैना योजना अन्तरगत सञ्चालन फागुन ८ गतेसे रोजगार मेला आयोजना करले बाटी । मेलाके अवलोकनके लाग सक्कु जनहनहे अनुरोध करटुँ,’ हमाल कहलै, ‘विशेष कैके युवा संघरिया मेलामे आके अध्ययन कैडेबी अगामी दिनमे कौन कौन खालके तालिम आवश्यक बा । सुझाव डेबी । का–का चीजमे सुधार करे परी । उ सुझाव फेन डेबी ।’
हमाल विद्यार्थी, युवा ओ अभिभावक सक्कु जनहनहे मेलामे निःशुल्क रुपमे तालिम सञ्चालन ओ अवलोकनके व्यवस्था मिलाके सहभागी होके अवलोकन कैना सार्वजनिक अपिल करले बाटै ।

धनगढी उपमहानगरपालिकाके आयोजनामे इहे ८ फागुनसे सञ्चालन हुइल सीम तथा रोजगार मेलामे २९ विधामे तालिम हुइटी रहल बावै ।

सुदूरपश्चिम प्रदेशके ३९ स्थानीय तहसे एक हजार ४० जाने सहभागी रहल सीप तथा रोजगार मेलामे उपमहानगरपालिकासे साँझ सकार डुई चरणमे तालिम प्रदान करटी रहल बा ।