मुक्तकमैया ओ श्रमिकसे संयुक्त रुपमे बुझैले १२ बुँदे माग सहितके ज्ञापनपत्र
खुशीराम चौधरी
बर्दिया, ५ चैत । मुक्तकमैया समाज, कमैया महिलाजागरण समाज ओ श्रमिक संगठनसे संयुक्त रुपमे बारबर्दिया नगरपालिका ओ ठाकुरबाबा नगरपालिकाहे १२ बुँदे मागसहितके ज्ञापनपत्र बुझागिल बा ।
ठाकुरबाबा नगरपालिका प्रमुख तिलक लम्साल ओ बारबर्दिया नगर प्रमुख छविलाल थारुहे मुक्तकमैया पुनस्र्थापना कार्यविधि २०८१ निर्माण कैना टमान मागसहित ज्ञापनपत्र बुझाइल हो ।
वि.स.२०५७ साउन २ गते सरकारसे कमैया मुक्तिके घोषण करलेसेफे अभिन मुक्तकमैया भुमि सम्वन्धी समस्या, श्रम, ज्यालालगाएतके टमान समस्या रहल ओरसे कार्यविधि निर्माण करके समस्या सम्बोधनके लाग मुक्तकमैया समाज, कमैया महिलाजागरण समाज ओ श्रमिक संगठनसे संयुक्त रुपमे ज्ञापनपत्र बुझागिल कमैया महिला जागरण समाज नेपालके सामाजिक परिचालक प्रेमकुमारी थारु जनैली ।
मुक्तकमैया समाज लुम्बिनी प्रदेश समिति अध्यक्ष जागेश्वर थारुके अगुवाईमे यिहे चैत ३ ठाकुरबाबा ओ ४ गते बारबर्दिया नगरपालिकामे बुझाईल रहे ।
ज्ञापनपत्रमार्फत मुक्तकमैया परिवारहे स्वतन्त्रपुर्वक जीवन जिएसेक्ना करके नगरपालिका स्तरीय पुनःस्थापनाके लाग नीति तथा कार्यक्रममे धारके एकीकृत प्याकेज निर्माण, कामज्याला, समानता, स्वतन्त्रतासहित शिक्षा, स्वास्थ्य रोजगारी, सामाजिक सुरक्षासहितके दिगो जीविकोपार्जन सुनिश्चित कैना संगठनसे माग करले बा ।
अनौपाचारिक श्रमशक्ति ओ श्रम बजार सम्वन्धी अध्ययन, अनुसन्धान, तथ्यांक, अद्यावधिक, विश्लेषण ओ श्रमशक्ति सम्वन्धी कार्य योजना निर्माण करेपर्नाफे माग करल बा । सामाजिक सुरक्षा तथा ट्रेड युनियन सम्वन्धी पालिकास्तरिय नीति, कानुन, मापदण्ड ओ नियमन सम्वन्धी कार्यविधि निर्माण, न्युनतम पारिश्रमिक निर्धारण, श्रमिकहुकनके सामाजिक सुरक्षाके सन्दर्भमे व्यवसायजन्य स्वरोजगार सेवा सम्वन्धी आवश्यक कार्य कैना ज्ञापनपत्रमे उल्लेख करल बा । मुक्तकमैया ओ युवाहुकनहे सीप विकास तालिम, नेतृत्व विकास तालिमके व्यवस्था करेपर्ना, श्रमिकहुकनके विमा, समयमे ज्याला, श्रमिक सहायता कक्षके प्रावधान करेपर्नाफे माग करल बा ।
ओस्टेक करके अनौपचारिक क्षेत्रके श्रमिकहेफे योगदानमे आधारित सामाजिक सुरक्षा कोषमे आवद्ध कराके स्थानीय सरकारमे ओइनके दर्ता करके स्थानीय सरकारसे अगुवाई करेपर्ना, स्थानीय सरकारसे श्रम ऐन, निर्देशिका तथा कार्यविधि बनाके अनुगमन, महिला श्रमिकहुकनके लाग स्वरोजगारी र्सिजना, मागमे आधारित आवश्यक सीपके लाग तालिमके व्यवस्थापन तथा श्रमिकमैत्री नीति तथा कार्यक्रम बनाके लगानी करेपर्ना मागसहितके ज्ञापनपत्र बुझाइल मुक्त कमैया समाज लुम्बिनी प्रदेश समिती अध्यक्ष जागेश्वर थारु बटैलै ।
ज्ञापनपत्र बुझटी बारबर्दिया नगर प्रमुख छविलाल थारु मुक्तकमैया ओ श्रमिकह्कनके समस्याहे सम्बोधन करटी रहल बटैलै । नगरपालिकासे अनुमति डेके गैरसरकारी संस्थासेफे समस्या सम्बोधन करटी रहल बटी श्रमिकहुकनके अवस्थाबारे अनुगमन करटी रहल ओ ज्यालामे ठगि हुइल सम्बन्धमेफे न्यायिक समितीमार्फत समस्या समाधान करटी रहल उहाँ बटैलै ।
ओस्टेक करके संगठनसे बुझाइल ज्ञापनपत्र बुझटी ठाकुरबाबा नगरपालिकाके नगर प्रमुख तिलक लम्साल मुक्तकमैया ओ श्रमिकहुकनके समस्याबारे जानकार रहल बटैलै । श्रमिकहुकनहे ज्याला नैडेहटसम पालिकासे निर्माण कार्य सम्पन्न हुइल भुक्तानी रोक्का कैना करल ओ रोजगारदातासे श्रमिकहे अपन सामुन्ने ज्याला डहे लगाइल बटैलै । उहाँ मुक्तकमैयाहुकनके समस्या समाधानके लाग अपने लाग परल समेत दावी करलै ।
(प्रशिक्षार्थी पत्रकार, बीए तेस्रो वर्ष, श्री अमर शहिद बहुमुखी क्याम्पस, बर्दिया)
