गैरपरम्परागत क्षेत्रमे महिला सहभागिता आवश्यक
पहुरा समाचारदाता
धनगढी, ६ चैत । निजी क्षेत्र तथा सम्भावित उद्यमीहुकनसँग गैर परम्परागत क्षेत्रमे महिला उद्यमीहुकनके सहभागिता, चुनौती तथा अवसर विषयक अन्तरक्रिया सम्पन्न हुइल हुइल बा ।
एफसिए, वुमन बैंक, धनगढी उपमहानपालिकाके सहयोगमे मुक्तकमैया महिला विकास मञ्चसे सञ्चालित ‘गैर परम्परागत क्षेत्रमा महिला उद्यमशिलता विकास परियोजना’ अन्र्तगत हुइटी रहल क्रियाकलापमे रहिके अन्तरक्रिया हुइल हो ।
धनगढी उपमहानगरपालिकाके नगर उपप्रमुख कन्दकला रानाके प्रमुख आतिथ्यतामे हुइल कार्यक्रममे धनगढी उपमहानगरपालिकासे महिला उद्यमशिलता सम्बन्धी टमान कार्यक्रम करटी रहल ओरसे महिला सहभागिता बह्रैना समन्वय करके आघे बह्रना आग्रह करली ।
उपमहानगरपालिका महिला उद्यमीहुकनके लाग प्रत्येक शनिच्चर महिला उद्यमी मेला सञ्चालन करटी आइल बा जेम्ने महिलाहुक्रे आर्थिक रुपमे बल्गर बन्टी गैल बटै । कलेसे सिखल सीपके विकासके लाग सीप तथा रोजगार मेला जारी रहलमे १ हजार ४० जाने प्रत्यक्ष ४० विधाके सीप सिख्टी रहल उहाँ बटैली । परियोजनासे नीति अनुसार उपलब्धी हुइना मेरिक गतिविधि संचालन कैना ओ समन्वय करके आघे बह्रना जरुरी रहल नगर उप प्रमुख राना बटैली ।
अब्बेक आवश्यकता जे सीप नै सिख्ले हो नयाँहे सीपसे जोरना ओ जे ठोर ठोर सिख्ले बा, ओकर और दक्ष बनाके रोजगारीसे जोरना उहाँ बटैली ।
कार्यक्रममे सीप तथा रोजगार मेला समिति संयोजक प्रमोद पाठक नेपालीहुकनहे सीपसे जोरेक लाग बहिय देशसेफे सिखे पर्ना बटैलै । उहाँ कहलै, छिमेकी मुलुक भारतमे छोटे रोजगारी सुरु कैठै नेपालीफे ओइनके मजा सीपके अनुसरण कैना जरुरी बा । नेपालमे खेर जैना प्याज, लसुन, वेम्टीहे सुखुवाके पाउडर बनाके मसला बनाई सेक्लेसे ओकर मुल्य पाई सेक्ना बटैलै ।
गोदावरी नगरपालिकाके उद्यम विकास शाखा प्रमुख रोहितप्रसाद जोशी सकारात्मक सोच राख्के सहकार्य करटी आघे बह्रना सल्लाह डेलै ।
ईटा व्यवसायी संघके अध्यक्ष विनोद शाह कैलाली कञ्चनपुरमे एक सय ईटा उद्योगमे महिला पुरुष रोजगारी पाइल बटैलै । उहाँ कहलै, उद्योगमे कामदारके अभाव बा । ईटा उद्योगमे नेपाल सरकारसे तोकल ज्यालासे ढेर पैटी रहल बटै । एक दम्पती दैनिक २५ सय ईटा परठै । ओइनके कमाई दैनिक २५ सय हो । अब्बे २० प्रतिशत उद्योग बन्द हुइल उहाँ बटैलै ।
व्यूटिसियन व्यवसायी सपना रोकाय नेपालमे रोजगारदाता रहलेसेफे रोजगारी करुइया दक्ष व्यक्तिके अभाव हुइल बटैली । उहाँ कहली, ‘यहाँ एक व्यक्ति टमान मेरिक तालिम लेना मने दक्ष नैहुइल कारण बाहेरसे रोजगारी करुइया व्यक्ति ल्याने पर्ना अवस्था बा ।
गैर परम्परागत क्षेत्रमे महिला उद्यमशिलता विकास परियोजनाके अनुगमन तथा अनुसन्धान अधिकृत पदमराज जोशी परियोजनाके गतिविधिबारे प्रस्तुतीकरण करल रहिट ।
६ महिनाके अवधिमे बजार मुल्याङकन ओ गैर परम्परागत क्षेत्रके लाग नीजि क्षेत्रके सम्भाव्यता अध्ययन कैना, गैर परम्परागत उद्यमम लगानी कैना विद्यामन प्रमुख कम्पनीहे प्रोत्साहन कैना, नगरपालिकास्तर उद्यमशिलता केन्द्र स्थापनाके लाग अन्तरक्रिया, नगरपालिकास्तरमे उद्यमशिलता केन्द्र संचालनके ढाँचा विकास कैना, सम्मावित उद्यमीके पहिचान ओ छनौट, उद्यमशिलता विकासमे अभिमुखीकरण, सहकारीमे मुल्याङकन ओ अवस्था विश्लेषण कैगिल रहे ।
परियोजना अन्र्तगत गैर परम्परागत क्षेत्रमे सीप विकास तालिम, व्यावसाय स्थापनाके लाग सहयोग, परियोजनाके कर्मचारीनहे लैङिक संवेदनशिलतामे प्रशिक्षक प्रशिक्षण तालिम, सामुदायिक जागरण अभियान संचालन, परियोजना अभिमुखीकरण, वेव लाइन सर्वे, कर्मचारी अभिमुखीकरण कार्यक्रम कैना बटैलै ।
परियोजनासे पाँच जाने व्यक्तिहुकनहे उद्यम स्थापनाके लाग रु ४० हजारसे ६० हजार सम्म सहायता प्रदान करले बा । पाँच जाने व्यक्तिहुकनहे टमान मेरके तालिम प्रदान करले बटै ।
धनगढी उपमहानगरपालिका वडा नम्बर १० के अशोक राना परियोजना मार्फत सहयोग पाके मोवाइल मर्मत केन्द्र संचालन करले बटै । उहाँ एक अपाङगता रहल व्यक्ति हुइट ।
धनगढी उपमहानगरपालिका–१७, पथरीके करुणा राना परियोजनासे तालिम ओ आर्थिक सहयोग पाके होटल व्यवसायहे विस्तार करले बटी ।
धनगढी उपमहानगरपालिका–१७ भागीराम चौधरी संस्थासे आर्थिक सहयोग पाके गारमेन्ट व्यवसाय संचालन करल बटै । धनगढी उपमहानगरपालिका–१७ धुरझन्नाके गरिबलाल चौधरी उ संस्थासे सञ्चालित ‘गैर परम्परागत क्षेत्रमा महिला उद्यमशिलता विकास परियोजना’ मार्फत तालिम ओ आर्थिक पाके हेयर कटिङ खोलल बटै । कलेसे धनगढी उपमहानगरपालिका–८ के मोहित चौधरी आल्मुनियमे व्यवसाय संचालन करे जाइटै ।
कार्यक्रममे मुक्त कमैया महिला विकास मञ्चके संस्थापक अध्यक्ष कौशिला चौधरी स्वागत मन्तव्य करटी यी परियोजना गैर परम्परागत क्षेत्रमे महिला उद्यमशिलता विकास करेक लाग ल्यानल मने ओहोर ओर चासो नैडेखल बटैली । धनगढी उपमहानगरपालिकासे साझेदारी करके कैगिल कार्यक्रममे महिलाहुकन ढेर प्राथमिकता डेहे खोजल बटैली ।
मुक्तकमैया महिला विकास मञ्चके कोषाध्यक्ष बजारी चौधरीके अध्यक्षतामे हुइल कार्यक्रममे गैर परम्परागत क्षेत्रमा महिला उद्यमशिलता विकास परियोजनाके गोदावरी उद्यम विकास अधिकृत सन्तोष पराजुली कार्यक्रम संचालन करल रहिट ।
कार्यक्रममे गैर परम्परागत क्षेत्रमा महिला उद्यमशिलता विकास परियोजनाके धनगढी क्षेत्रके उद्यम विकास अधिकृत प्रदीपकुमार चौधरी, गैर सरकारी संस्था महासंघ कैलालीके अध्यक्ष चेतमान साउद, धनगढी उमहानगरपालिकाके रोजगार शाखा प्रमुखलगायत सहभागिता रहे ।
धनगढी उपमहानगरपालिका ओ गोदावरी नगरपालिकाके सक्कु वडामे कार्यक्षेत्र रहल परियोजनाके अवधि २०२६ डिसेम्बरसम रहल बा ।
