‘खखडेहरा रानाथारु समुदायके पहिचान ओ इतिहास बोकल टिह्वार हो’
पहुरा समाचारदाता
धनगढी, ८ चैत । सुदूरपश्चिम प्रदेश प्रमुख नजिर मियाँ खखडेहरा रानाथारु समुदायके पहिचान ओ इतिहास बोकल टिह्वार रहल बटैले बाटै । खखडेहरा टिह्वारके अवसरमे शुकके एक शुभकामना सन्देश व्यक्त कैटी उहाँ इ टिह्वारहे राना थारु समुदायमे एक आपसमे भाइचारा आपसी मिलन ओ सुमधुरता लन्ना टिह्वारके रुपमे समेत चित्रण करल बटैले बाटै ।
‘रानाथारु समुदायके पहिचान ओ इतिहास बोकल टिह्वार हो । इ टिह्वारहे राना थारु समुदायमे एक आपसमे भाइचारा आपसी मिलन ओ सुमधुरता लन्ना टिह्वारके रुपमे समेत चित्रण करजाइठ् ।’ प्रदेश प्रमुख मियाँके शुभकामना सन्देशमे उल्लेख करल बा ।
उहाँ टिह्वारसे राष्ट्रियताहे मजबुत लन्ना ओ इ अस्टे टिह्वारके महत्त्वपूर्ण भूमिका रहल कहटी पुरान पुस्तासे लावा पुस्ता संस्कृति अनुसरण कैना फेन आवश्यक रहल उहाँके कहाइ बा ।
‘सामाजिक सांस्कृतिक सहिष्णुता ओ ऐक्यबद्धताके माध्यमसे राष्ट्रियताहे मजबुत लन्ना इ ओ अस्टे टिह्वारके महत्त्वपूर्ण भूमिका रहठ्’ प्रदेश प्रमुख मियाँके शुभकामना सन्देशमे कहल बा, ‘अइसीन टिह्वारहे सभ्य ओ भव्य ढङ्गसे मनैटी आगामी दिनमे निरन्तरता डेहक लाग पुरान पुस्तासे लावा पुस्ताहुक्रे संस्कृति अनुसरण कैना आवश्यक रहल बा ।’
उहाँ खडखडेहरा टिह्वार २०८१ से सक्कु नेपालीजनमे लावा उत्साह सुख समृद्धि ओ उमङ्ग छर्टी न्यायपूर्ण सभ्य सुसंस्कृत ओ प्रगतिशील समाज निर्माणमे अग्रसर हुइना प्रेरणा प्रदान करे कहटी कामना करले बाटै ।
पश्चिम तराईके आदिवासी राना थारु समुदाय आज खखडेहरा पर्व मनैटी बाटै । राना थारु समुदायके सबसे बरवार टिह्वारके रूपमे रहल होरीके समापनके रूपमे खख्डेहरा मनाजाइठ् । राना थारु समुदायके खख्डेहरा टिह्वारके अवसरमे सुदूरपश्चिम प्रदेश सरकार एक दिन सार्वजनिक बिदा समेत डेले बा । नेपालके कञ्चनपुर ओ कैलाली तथा भारतके उत्तर प्रदेश ओ उत्तराखण्डमे बसोबास कैना राना थारु समुदाय अक्के साथ इ टिह्वार मनैना करठै ।
