६०औं अन्तर्राष्ट्रिय जातीय विभेद उन्मुलन दिवस मनागिल
पहुरा समाचारदाता
हसुलिया, ९ चैत । कैलाली जिल्लाके कैलारी गाउँपालिका वडा नम्बर १ हसुलियामे ६०औं अन्तर्राष्ट्रिय जातीय विभेद उन्मुलन दिवस मनागिल बा ।
कैलारी गाउँपालिका स्तरीय दलित समन्वय समितिके अध्यक्ष प्रेम सिंह भुलके अध्यक्षतामे हुइल कार्यक्रममे प्रमुख अतिथि नेपाली काँग्रेसके केन्द्रीय सदस्य तथा धनगढी उपमहानगरपालिकाके पूर्व नगर प्रमुख नृप बहादुर वड ओ विशिष्ट पहुना कैलारी गाउँपालिकाके उपाध्यक्ष भगवतीकुमारी चौधरी रहल रहिट ।
कार्यक्रममे सम्बोधन कैटी प्रमुख अतिथि वड जातीय उन्मुलन हुसेकल बेलाफे कबु कबु विभेदके घटना अइटी रहल ओरसे ओकर विरुद्ध सक्कु जाने एकजुट हुइना आवश्यक रहल बटैलै । दलित समुदाय शैक्षिक रुपमे अभिनफे पाछे रहल ओरसे शैक्षिकसंगे राजनितिक जागरण आवश्वयक रहल उहाँ बटैलै । नेपालके संविधानमे जातीय विभेदके अन्त्य हुइल ओ कोई जातीय विभेद करले कानून बमोजिम कार्वाही हुइना कहिसेकल ओरसे कानून कार्यान्वयन आवश्यक रहल बटैलै ।
कार्यक्रमके विशिष्ट पहुना कैलारी गाउँपालिका उपाध्यक्ष भगवतीकुमारी चौधरी संविधानमे समुदायके लाग ढेर अधिकार डेहल मने अभिनफे ओकर उपभोग कैनासे बञ्चित रहल बटैली । अधिकारके लाग आवाज उठाई पर्ना बटैली । गाउँपालिकासे लक्षित वर्ग अन्र्तगत दलित समुदायके लाग बजेट विनियोजन करके सीपमुलक तालिमके व्यवस्था करल उहाँ बटैली ।
हम्रे दिगो विकास, समाज निर्माणके बाट करठी, गाउँपालिका उपाध्यक्ष कहली, ‘आबके आवश्यकता समावेशी ओ समतामुलक समाजके निर्माण कैना जरुरी बा । हरेक ठाउँ तह तप्कामे सामानुपतिक समावेशी हुइ पर्ना हो ।’
महिलाहुक्रन अभिनफे पाछे पारल ओम्नेफे दलित समुदायके महिला और पाछे रहल उहाँ बटैली । दलित समुदायके लाग अलग कोटाके व्यवस्था रहल ओरसे शैक्षिक रुपमे आघे बह्रलेसे अवसर पाई सेक्ना उपाध्यक्ष बटैली । पहिले पहिले घरभिटर पैठे नैदेना,आपन घरके भाडामे खाई नैडेना चलन रहे, मने अब्बे सुधार हुइटी गैल उहाँ बटैली ।
कार्यक्रममे कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी, कार्यपालिका सदस्य लालबहादुर विक, कैलारी गाउँपालिका स्तरीय दलित समन्वय समितिके पूर्व अध्यक्ष दिपक सुनार, नेकपा एमाले जिल्ला सदस्य गोरबहादुर विक, शिक्षक राम सिंह भुल, योगेन्द्र सुनार, ललिता सिके, राधिका विकलगायत मन्तव्य राखल रहिट । कार्यक्रममे स्वागत मन्तव्य कैलारी गाउँपालिका वडा नम्बर ४ के वडा सदस्य शोभा परियार ओ संचालन रामसिंह भुल करल रहिट ।
यिहे विच दिवसके अवसरमे टमान जनहनहे सम्मानफे कैगिल बा । एसइइमे मजा नतिजा ल्यानके पास हुइल दिपेन्द्र माविके सुनिल विक, कक्षा आठके परिक्षामे मजा नतिजा ल्यानके पास हुइल दिपेन्द्र माविके खुशी विक, विचैपुर माविके तेजबहादुर विक, महेश सार्कीहे सम्मान कैगिल बा ।
ओस्टेक अनाथ असहायमे कैलारी १ विसनपुर कटानके सन्ध्या भुल, आइसा भुल, सरिता विक, कैलारी–२ कुकुरभुक्काके विक्रम रैक्राल, कैलारी–४ के गाउँक सावित्री सुनार, सरस्वती सुनार, विश्वास सुनार, कैलारी–९ के केशव परियारहे सम्मान करल बा ।
ओस्टे दिपक सुनार, सुशिका तिरुवा, कौशिला कोली ओ सम्झना नेपालीफे सम्मानित हुइल बटै । कार्यक्रममे जनचेतनामुलक देउडा, टमान नृत्य डेखागैल रहे ।
दिवस कार्यक्रममे कैलारी गाउँपालिका वडा नम्बर ३ के वडा अध्यक्ष सन्तराम चौधरी, नेपाल तरुण दलके केन्द्रीय सदस्य अमृत विसि, वडा अध्यक्षहुक्रे, कार्यपालिका सदस्य, वडा सदस्य, टमान राजनितिक दलके प्रतिनिधि, दलित समुदायके अगुवा तथा बुद्धिजिवीहुकनके सहभागिता रहे ।
कार्यक्रममे समन्वय तथा सहकार्य कैलारी गाउँपालिकाको कार्यालय, वडा नम्बर १ के कार्यालय, जर्मन को–अपरेशन, ब्रोट फर डाई वेल्ट, सहास नेपाल, दलित महिला अधिकार मञ्च, डिसिए, सामुदायिक विकास केन्द्र डोटी, फेडोलगायतसे कैगिल रहे । यिहे विच दिवसमे अवसरमे जातीय विभेद विरुद्धके नारासहित प्रभातफेरी ¥याली निकारके हसुलिया बजार परिक्रमा कैगिल रहे ।
