एकीकृत समाजवादीके पहिल प्रदेश अधिवेशन धनगढीमे हुइना
पहुरा समाचारदाता
धनगढी, १३ चैत । नेपाल कम्युनिष्ट पार्टी एकीकृत समाजवादीके पहिल सुदूरपश्चिम प्रदेश अधिवेशन धनगढीमे हुइना बा ।
सुशासन ओ रोजगारी, समाजवादके तयारी कना नारासहित प्रदेश अधिवेशन चैत १७ ओ १८ गते धनगढीमे कैना बुधके धनगढीमे आयोजित पत्रकार सम्मेलनमे प्रदेश अध्यक्ष हर्कबहादुर सिंह जानकारी डेलै ।
उहाँ अधिवेशनके लाग ९ जिल्लामे प्रतिनिधि छनोट करसेकल बटैलै । उहाँक अनुसार अधिवेशन सम्पन्न करेक लाग मुल आयोजक कमिटिसंगे टमान समिति गठन करल बा । सुदूरपश्चिम प्रदेशमे १७ हजार ६ सय ७९ जाने संगठित सदस्य रहल एकीकृत समाजबादीके प्रथम प्रदेश अधिवेशनमे झण्डे ५ सय जाने सहभागी रना अध्यक्ष सिंह जानकारी डेलै ।
पत्रकार सम्मेलनमे पार्टीक केन्द्रीय केन्द्रीय उपाध्यक्ष एवं सुदूरपश्चिम प्रदेश ईन्चार्ज भानुभक्त जोशी प्रदेश अधिवेशनमे पार्टीके केन्द्रीय अध्यक्ष माधवकुमार नेपाल, महासचिव घनश्याम भुषाललगायत पदाधिकारीके सहभागिता रना जानकारी डेलै । उहाँ देशमे शुसासनके समस्या रहल बटैलै ।
उपाध्यक्ष जोशी देशमे ढेर निरासाके अवस्था नैरहल बटैटी मने फे देशमे निराशा डेख्टी रहल उल्लेख करलै । उहाँ कहलै, ‘शुसासन, बेरोजगारी, उत्पादन लगायतके समस्यासे जनतामे आक्रोस बा, सक्कु दल मिल्के यकर समाधान खोजे परठ ।’
पूर्वमन्त्री समेत रहल जोशी आब राजनीतिक दलसे नारा केल्ह डेके नैहुइना कार्यक्रम डेहे पर्ना बटैलै । उहाँ आलोचना करके केल नैहुइना सत्ता पक्ष ओ विपक्षी सक्कु जाने सहकार्य करके देश व्यापी अभियान संचालन कैना आवश्यक रहल बटैलै ।
नेता जोशी दुई भारी दल और संग सहकार्य नैकरके आघे बह्रटी रहल कारण समस्या बल्झटी रहल बटैटी कहलै, ‘हमार पार्टी विपक्षमे रहलेसफे राष्ट्रिय समस्या समाधानके लाग सहकार्य कैना तयार बा ।’
