समयमे सूचना उपलब्ध करैना निर्देशन
पहुरा समाचारदाता
धनगढी, १३ चैत । कैलालीके प्रमुख जिल्ला अधिकारी गोगन बहादुर हमाल यहाँके सरकारी निकायके सूचना अधिकारीहे समयमे सूचना उपलब्ध करैना निर्देशन डेले बाटै ।
जिल्ला प्रशासन कार्यालयके आयोजनामे कैलालीके टमान सरकारी कार्यालयके सूचना अधिकारीहुक्रन बिच बुधके हुइल छलफल कार्यक्रममे प्रमुख जिल्ला अधिकारी हमाल सरकारी निकायसे सम्पादन हुइल गतिविधीके सूचना समयमे उपलब्ध करैना निर्देशन डेहल हुइट ।
सूचनाहे प्रभावकारी ओ व्यवस्थित बनाइक लाग हरेक सरकारी निकायमे सूचनाअधिकारके व्यवस्था करल कहटी उहाँ सेवाग्राहीहे सहजरुपमे सूचना प्रवाह कैना अनुरोध करल रहिट । प्रमुख जिल्ला अधिकारी सही सूचना प्रवाहसे सुशासन फेन कायम हुइना कहटी सूचना प्रवाहहे चुस्तद्रुस्त बनैना फेन अनुरोध करल रहिट ।
कार्यक्रममे सेती प्रादेशिक अस्पतालके सूचना अधिकारी किशोर श्रेष्ठ सेवाग्राहीसे मागल सूचना समयमे उपलब्ध करैटी आइल बटाइल रहिट । उहाँ ढेर जैसिन सेवाग्राही स्वास्थ्य सेवा सुविधाबारे जानकारीके लाग आइल ओरसे उहाँहुक्रनहे अस्पातलसे डेजैना स्वास्थ्य सुविधाके बारे समयमे जानकारी करैटी आइल बटाइल रहिट ।
ओस्टके घरेलु तथा साना उद्योग कार्यालयके सूचना अधिकारी सर्मिला बस्नेत ढेर जैसिन सेवाग्राही उद्योग दर्ता तथा नवीकरण सम्बन्धी जानकारीके लाग आइल बटैटी उहाँहुक्रनहे समयमे उ बारे जानकारी करैना बटाइल रही ।
जिल्ला प्रशासन कार्यालयके प्रशासकीय प्रमुख एवं सूचना अधिकारी शिवराज जोशी सूचना प्रवाहमे समस्या अइलेसे प्रशासनहे जानकारी करैना अनुरोध करल रहिट ।
नेपाल पत्रकार महासंघके कैलाली अध्यक्ष श्रवण देउवा सार्वजनिक निकायके सक्कु सूचना अधिकारीहुक्रनहे समयमे सूचना उपलब्ध कराके सहयोग कैना आग्रह करल रहिट ।
कार्यक्रममे जिल्ला हुलाक कार्यालय कैलालीके निमित्त हुलाक निर्देशक जितेन्द्र विक सूचनाके हक, अधिकार ओ कार्यान्वयनके पक्ष सहित सूचनाअधिकारीके काम कतब्र्यबारे आपन प्रस्तुती राखल रहिट । कार्यक्रममे जिल्ला स्थित सरकारी कार्यालयके सूचना अधिकारी, पत्रकारहुक्रनके सहभागिता रहल रहे ।
