लैंगिक मैत्री विपद् प्रतिकार्यके लाग सरोकारवालासंग परामर्श

पहुरा समाचारदाता
धनगढी, १४ चैत । कैलालीके भजनीमे लैंगिक मैत्री विपद् प्रतिकार्यके लाग सरोकारवालासंग परामर्श बैठक हुइल बा ।

ओरेक नेपाल ओ भजनी नगरपालिकासंगके संयुक्त समन्वय तथा सहकार्यमे लैंगिक मैत्री विपद् प्रतिकार्यके लाग सरोकारवालासंगके परामर्श बैठक हुइल हो । बैठकमे लैंगिक हिंसा, विपद् प्रतिकार्यमे बरघर भल्मन्सा, महिलासे नेतृत्व करल स्थानीय सस्थाहुकनके भूमिका सवालके साथे यौनिक तथा लैङिकक अल्पसंख्यक समुदायके सवाल ओ पालिकासे तयार करल विपद् प्रतिकार्य पूर्व तयारी योजनाबारे अभिमुखीकरण कैगिल बा ।

ओस्टेक करके जलवायु न्याय, लैंगिक हिंसा, यौन तथा प्रजनन् स्वास्थ्यके सवालमे लैंगिक समावेशिताके लाग सरोकारवाला निकाय विच पैरवी बैठकफे कैगिल बा ।

कार्यक्रममे जिल्ला समन्वय प्रमुखके टिका चौधरीभुल, भजनी नगरपालिकाके नगर प्रमुख केवल चौधरी, उपप्रमुख राजु तिरुवा, कैलारी गाउँपालिकाके उपाध्यक्ष भगवतीकुमारी चौधरी, भजनी, टिकापुर नगरपालिका ओ कैलारी गाउँपालिकाके विपद् शाखा प्रमुख, भजनी नगरपालिका महिला बालवालिका तथा जेष्ठ नागरिक उपशाखा, स्वास्थ्य संस्था, ईलाका प्रहरी रेडक्रस सोसाइटी स्थानीय विपद् प्रतिकार्यमे काम कैना संस्था महिला मानव अधिकार रक्षक संजाल, महिलासे नेतृत्व करल सस्था महिला समुह लगायतके सहभागिता रहे ।

फागुन ११ से १३ गतेसम हुइल छलफलसे आइल सवाल, सुझाव ओ निष्कर्षहे लेके ध्यानाकर्षण पत्र तयारी करके सम्बन्धित निकायमे बुझैना ओरेक नेपालके जिल्ला संयोजक गीता चौधरी जनैली ।