विपद व्यवस्थापनके लाग समयमे ध्यान डेना आवश्यकः जिसस प्रमुख चौधरी
पहुरा समाचारदाता
धनगढी, १४ चैत । जिल्ला समन्वय समिति कैलालीके प्रमुख टिका चौधरी विपद व्यवस्थापनके लाग समयमे ध्यान आवश्यक रहल बटैले बटी ।
बुधके रोज कैलालीके भजनीमे ओरेक नेपालसे आयोजित जलवायु न्याय, लैंगिक हिंसा, यौन तथा प्रजनन स्वास्थ्य ओ लैंगिक समावेशिताके लाग सरोकारवालाहुकनसंगके पैरवी बैठकमे बोल्टी उहाँ उहाँ यैसिन बटाइल बटैली । विपदसे सबसे ढेर बालबालिका, ज्येष्ठ नागरिक अे गर्भवती महिला ढेर प्रभावित हुइना ओरसे समयमे सचेत हुके लागे पर्ना बटैली ।
विपद बाजा बजाके नैअइना बटैटी उहाँ समयमे पूर्वतयारी करे पर्ना बटैली । विपद व्यवस्थापनके लाग बजेट आवश्यक हुइल बटैटी उहाँ स्थानीय तह बजेट विनियोजन करे चुकल बटैली । लैङिगक हिंसासे कैसिक बाँचे सेक्जाई कना विषयमेफे गम्भीर हुके सोचे पर्ना बटैटी उहाँ राहात वितरणफे प्रभावकारी हुई नैसेकल बटैली ।
कैलारी गाउँपालिकाके उपाध्यक्ष भगवती चौधरी सबसे ढेर मानविय विकासमे ध्यान डेहे पर्ना बटैटी मानविय विकास हुइलेसे विपद जोखिम न्यूनिकरण करे सेक्ना बटैली । मानव अधिकारके विषयमे संघसंस्थासे आवाज उठाइल कारण अधिकार स्थापित हुइल बटैटी उहाँ मानविय विकासके लागफे आवाज उठाई पर्ना बटैली । मानविय विकासमे बजेट छुट्याई पर्ना बटैटी उहाँ विपदके चपेटामे महिला ढेर पर्ना करल बटैली ।
परामर्श बैठकसंगे पूर्व तयारी समेत रहल बटैटी उहाँ विपदमे एक दुसरहे सहयोग करेपर्ना बटैली ।
भजनी नगरपालिकाके उप प्रमुख राजु तिरुवा भजनी नगरपालिका कैलाली जिल्लामे सबसे ढेर विपद जोखिम पालिका रहल बटैटी हरेक बर्ष बाढ ओ डुवानसे वितण्डा मचैना करल बटैली । विपदसे अपाङगता हुइल व्यक्ति, महिला, बालबालिका, सुत्केरी ओ ज्येष्ठ नागरिक ढेर प्रभावित हुइना करल बटैटी उहाँ गैल बर्ष होटलमे धारके ओइनके व्यवस्थापन करल बटैली । भजनी नगरपालिकाके महिला वालवालिका तथा जेष्ठ नागरिक सह–सहयोजक जौंकला सार्की नगरपालिकामे उपमेयर महिला सुरक्षाकोष, लैंगिक हिंसा निवारण कोष ओ बालकोष कार्यान्वयनमे रहल बटैली ।
उहाँ औषधी उपचार,काउन्सिलिङ, जिविकोपार्जन लगायतमे सहयोग कैना करल जानकारी करैली । उहाँ ७ हजारसे ३० हजारसम डेना करल जानकारी करैली । ओस्टेक करके कार्यक्रममे सहभागी भजनी नगरपालिकाके धनसरा सुनार विपद बारे बच्न ओ बचैना विषयमे पूर्ण जानकारी हुइल बटैटी कार्यक्रम प्रभावकारी हुइल बटैली ।
ओस्टेक कैलारी गाउपालिकाके कृष्णा चौधरी समयमे सचेत हुइनाके साथे आवश्यक महत्वपूर्ण कागजात सुरक्षित रख्न सक्कुहुन सचेत करैना बटैली । उहाँ ओरेकसे स्नेह घर सञ्चालन करके विपद प्रभावित सुत्केरी महिलाहुकनहे सेवा डेटी आइलमे खुसी व्यक्त करली ।
विपद्से प्रभावितहहे राहात वितरण,विपद्से हुइसेक्ना क्षति न्यूनिकरण कैना समुदाय, विद्यालय, टमान समुह ओ सरोकारवालसंग अभिमुखिकरणके कार्य करल रहे । ओस्टेक करके विपद सम्बन्धी तयार पारल नीति कार्यविधि ऐनके निर्माण तथा अधावधिक करके अनुमोदन करल, विपद व्यवस्थापनमे अन्तर शाखा समन्वय सहकार्य कैना करल, पालिका तथा जिल्ला तहमे लैगिक हिंसाके मुद्दा सम्बोधन ओ सम्प्रेषण कैना संयन्त्र बनाइल स्थानीय तहमे दोहरटी रना विपद सम्बोधनके लाग तयारी प्रक्रिया निर्माण (विपद शाखा),सुरक्षा आवास भवनके व्यवस्थापन तथा पूर्व तयारी, लैंगिक हिंसा निवारण कोषके वितरण प्रक्रिया ओ फलोअपके अवस्थाके विषयमे समुहमे छलफल करल रहे ।
ओरेकके जिल्ला संंजोजक गीता चौधरी कार्यक्रम सञ्चालन कैनाके साथे कार्यक्रमबारेमे जानकारी कराइल रही कलेसे ओरेकके सपना थापा विपद सम्बन्धी आपन प्रस्तुती प्रस्तुत करल रही ।
