कैलारीमे उपाध्यक्ष समावेसी पोषण कार्यक्रम अन्तरगत सुत्केरीहुकनहे पोषण सामाग्री वितरण

पहुरा समाचारदाता
हसुलिया, १४ चैत । कैलाली जिल्लाके कैलारी गाउँपालिकामे उपाध्यक्ष समावेशी पोषण कार्यक्रम अन्र्तगत सुत्केरी महिलाहुकनके पोषण सामाग्री वितरण कैगिल बा ।

उपाध्यक्ष समावेशी पोषण कार्यक्रम अन्र्तगत थारू महिला संजाल हसुलिया, स्वास्थ्य चौकीसे कैलारी गाउँपालिका भिटरके स्वास्थ्य संस्थामे बच्चा जल्मुइया एक बरस भिटरके (लरकोरुइया) सुत्केरी महिलाहुकनहे पोषण सामाग्री वितरण कैगिल हो । अभिनसम कैलारी गाउँपालिका वडा नम्बर ३ ,४ ,५, ७ ओ ८ कैगिल रहे कलेसे विफेक रोज वडा नम्बर ६ ओ ९ मे सुत्केरी महिलाहुकनहे पोषण सामाग्री वितरण कैगिल बा ।

गाउँपालिका उपाध्यक्ष भगवतीकुमारी चौधरीके बरका पहुनामे हुइल कार्यक्रममे उहाँ उपाध्यक्ष समावेशी पोषण कार्यक्रम अन्र्तगत पोषण सामाग्री वितरण करेपाके खुशी लागल बटैली ।

उहाँ कहली, ‘एक ठो लरकोरया डाई जब बच्चा जल्मा सेकलपाछे उहीहे पोषण तथा सरसफाई सबसे ढेर आवश्यक रहल ओरसे यी सामाग्री वितरणपाछे राहत पुगी । पोषण सामाग्रीसे डाई ओ बच्चाहे फाईदा पुग्ना ओरसे सामाग्री हस्तान्तरण करल हो ।

यिहीसे आघे यी कार्यक्रम नैरहल मने अपनेहुक्रे जनप्रतिनिधिके रुपमे आइलपाछे महिलाके पीडा बुझके यी कार्यक्रम ल्यानल उपाध्यक्ष बटैली । यी कार्यक्रम असौ टिसरा बरस रहल उहाँ जनैली ।

सुत्केरी महिलाहुकनके पोषण सामाग्रीमे चना एक किलो, केराउ एक किलो, भटमास आधा किलो, टुथपेस्ट, व्रस, नोह कटनी, वेवी सोप, वेवी क्रिम, लगैना तेल एक÷एक पिस, घिउ आधा किलो, किसमिस, बदाम, एक÷एक प्याकेटसहित झोला वितरण कैगिल थारु महिला संजालके आरती चौधरी बटैली ।

वडामे रहल स्वास्थ्य संस्थासे डेहल तथ्याङक अनुसार सुत्केरी महिलाहुकनके पोषण सामाग्री हस्तान्तरण करल उहाँ बटैली । ओस्टेक शुकके रोज वडा नम्बर २ मे सुत्केरी महिलाहुकनहे पोषण सामाग्री वितरण कैना उहाँ जनैली ।