सुदूरपश्चिमके वन तथा वातावरणमन्त्री चौधरीसे राजीनामा

पहुरा समाचारदाता
धनगढी, १६ चैत । सुदूरपश्चिम प्रदेशके उद्योग, पर्यटन, वन तथा वातावरणमन्त्री लक्ष्मणकिशोर चौधरी पदसे राजीनामा डेले बटैं । लेनदेनके विवादास्पद अडियो बाहल आइलपाछे शनिच्चरके पत्रकार सम्मेलन कैके मन्त्री पदसे राजीनामा डेहल हुइट ।

चौधरी राजीनामा पत्र मुख्यमन्त्री कमलबहादुर शाहहे बुझासेक्ले बटैं । अतिरञ्जित तरिकासे अडियो सार्वजनिक होसेकलपाछे नैतिकताके हिसाब अपने पदसे राजीनामा डेके कानुनी रुपमे सत्यतथ्य छानविनके लाग मार्ग प्रशस्त करल चौधरी बटैलैं ।

उहाँ लेनदेनके विषयमे दोषी ठहर हुइलेसे कानुनी रुपमे सजायके भागेदार हुइना अपने तयार रहल उल्लेख करलै । नागरिक उन्मुक्ति पार्टीसे मन्त्री हुइल चौधरी सुदूरपश्चिम प्रदेशके दीगो वन व्यवस्थापन कार्यविधि मन्त्रिपरिषदसे पास कैके कार्यान्वयन कैना सन्दर्भमे आर्थिक लेनदेनके विवादास्पद अडियो बाहल हुइल बटाइल बा ।