घोडघोडीके पूर्व वडाध्यक्षके मृत्यु
पहुरा समाचारदाता
धनगढी, ५ बैशाख । कैलालीके घोडाघोडी नगरपालिका वडा नम्बर ९ के निवर्तमान वडाध्यक्ष कृष्णबहादुर शाहके मृत्यु हुइल बा । बिफेक रोज दिनके करिब १ बजे घोडाघोडी नगरपालिका ९ के सिमली खोलुवा लग्गे गम्भीर अवस्थामे उहाँ फेला परल रहिट ।
सल्फास नामक विषादीके खाली डब्बा ओ एकठो डायरी सँगे रहल अवस्थामे प्रहरी उहाँहे फेला पारल रहे । घरसे करिब ९ः३० बजे निकरल शाह कुछ व्यक्तिहे ‘अब यी संसारमे मै नैरहम’ कहल रहिट । उ व्यक्ति प्रहरीहे उहाँ बन्वाओर गैल सूचना डेहल रहिट । उहे सूचनाके आधारमे इलाका प्रहरी कार्यालय सुखडके टोली गैल रहे ।
‘सूचना पैटी किल हमे्र वहाँ गैलरही,’ इलाका प्रहरी कार्यालय सुखडके प्रमुख प्रहरी निरीक्षक दीर्घबहादुर साउँद कहलै, ‘उहाँहे गम्भीर अवस्थामे हम्रे भेटैली ओ तत्काल उद्दार कैके अस्पताल लैगिल रही ।’
प्रहरी तत्काल नै घोडाघोडी अस्पताल लानेबर चिकित्सक उहाँहे मृत घोषणा करल रहे । पोष्ट मार्टमके लाग शव सेती प्रादेशिक अस्पताल लानल बावै । प्रहरी भेटाइल सुसाइड नोटउपर अनुसन्धान कैना जनैले बावै ।
सुसाइड नोटमे उहाँ परिवारके सदस्यहे सम्बोधन कैके आपन भावना पोख्ले बाटै । ओस्टके राजनीतिप्रति नैराश्य जगैना सन्देश फेन डेहल प्रहरी स्रोतके कहाइ रहल बा ।
‘मै आजके मितिसे यी संसारमे नैरहम । सक्कु जनहनके बोझ बनल बाटुँ । यी बोझमे रहे नैचाहम । सत्य सत्य रामराम । सक्कु जाने मिलके बैठहो । झैझगडा नकरहो’, सुसाइट नोटमे लिखल बावै ।
सुसाइड नोटमे आपन दादाहे सम्बोधन कैटी राजनीतिमे नैअइना फेन आग्रह करले बाटै । ‘दाजु अपने राजनीतिमे नअइबी । यी लाइन ठिक नैहो । अपने व्यापार कैके खैबी’ सुसाइट नोटमे भेटल बावै ।
सुसाइड नोटमे हस्ताक्षर ओ मिति फेन उल्लेख हुइल पाइल प्रहरी जनैले बावै । ‘परिवारके सदस्य फेन सुसाइड नोटमे कुछ प्रश्न करले बाटै । हम्रे अनुसन्धानके लाग फेन इहीहे फोरेन्सिक ल्याबमे पठाब,’ प्रहरी निरीक्षक साउँद कहलै, ‘प्रारम्भिक रुपमे विष सेवनसे उहाँके मृत्यु हुइल डेखजाइठ् । हम्रे अनुसन्धानमे बाटी ।’
२०७४ सालके स्थानीय चुनावमे नेकपा (एमाले)से वडा नम्बर ९ मे विजयी हुइल शाह अब्बे नेकपा एमाले घोडाघोडी नगर कमिटी उपाध्यक्ष समेत रहिट ।
