कैलारी गाउँपालिकास्तरीय बाल भेला सम्पन्न
पहुरा समाचारदाता
हसुलिया, ६ बैशाख । बालबालिकाहुकनहे हरेक तहतप्कामे अर्थपुर्ण सहभागिता तथा वाल अधिकार सुनिश्चितताके लाग कैलारी गाउँपालिकामे दुई दिने बाल भेला सम्पन्न हुइल बा ।
कैलारी गाउँपालिका अन्र्तगतके बालबालिकाहुकनके क्षमता विकास संरक्षण ओ सम्बद्र्धन कार्यहे तदारुकताके साथे बाल अधिकारके सवाल उठान करेक लाग योजना निर्माण कैना उद्देश्यसे बाल भेला हुइलक हो ।
कैलारी गाउँपालिका महिला तथा वालबालिका शाखाके आयोजना तथा सामुदायिक विकास केन्द्र (सिडिसी, डोटी), बाल कल्याण संघ टीकापुरके ओ दिगो विकास समाज भजनीके समन्वयमे बाल भेला हुइल रहे ।
दुई बाल भेला समापन कार्यक्रममे स्थानीय वाल अधिकार समितिके संयोजक तथा गाउँपालिका उपाध्यक्ष भगवतीकुमारी चौधरी वरका पहुना रहिट । कार्यक्रममे सम्बोधन करटी अब्बे लागु औषध दुव्र्यसनके कारण यूवाहुकनके भविष्य अन्धकारओर ढकेल्टी गैल बटैली । बालबालिका काल्हके कर्णधार रहल बटैटी गलट डगर ओरसे कबुफे लागे नहुइना बटैली ।
लागु औषधसंगे बालविबाहके कारण लउण्डा लउण्डीक जीवनफे बर्वाद हुइल कारण आपन गोरमे नैठरहयाइटसम भोज नैकैना आग्रह करली ।
दुई दिने बालकल्याण संघके सोनुराम चौधरी, सामुदायिक अध्ययन केन्द्रके भक्तबहादुर खाती, कैलारी गाउँपालिका महिला तथा बालबालिका शाखा प्रमुख बालकुमारी चौधरी, सिडीसी डोटीके किशोरी सशक्तीकरण परियोजनाके कार्यक्रम संयोजक तिलक चौधरीलगायत सहजीकरण करल रहिट ।
समापन कार्यक्रम स्थानीय वाल अधिकार समितिके अध्यक्ष सुमतबहादुर चौधरीके अध्यक्षतामे हुइल रहे । कार्यक्रममे सामुदायिक अध्ययन केन्द्रके भक्तबहादुर खाती, सिडीसी डोटीके किशोरी सशक्तीकरण परियोजनाके कार्यक्रम संयोजक तिलक चौधरीलगायत मन्तव्य राखल रहिट ।
कार्यक्रमके संचालन समितिके सचिव करुणा चौधरी करल रही । कार्यक्रममे बाल कल्याण संघ टीकापुरके परसु चौधरी, सीडिसी डोटीके शकुन्तला चौधरी, पुजा घिमिरेलगायत प्रत्येक वडाके ६५ जाने विद्यार्थीनके सहभागिता रहे । ओस्टेक उदघाटन कार्यक्रममे कैलारी गाउँपालिका वडा ३ के वडा अध्यक्ष सन्तराम चौधरी, वडा नम्बर ५ के वडा अध्यक्ष विष्णु प्रसाद चौधरी, कैलारी गाउँपालिका सामाजिक विकास शाखा प्रमुख यगम कलेल लगायतके सहभागिता रहे ।
