कैलारीमे पोषण कार्यक्रमके दुसरा चौमासिक प्रगती समिक्षा

पहुरा समाचारदाता
हसुलिया, १३ बैशाख । कैलारी गाउँपालिकाके पोषण कार्यक्रमके दुसरा चौमासिक प्रगती समिक्षा कार्यक्रम शुकके रोज सम्पन्न हुइल बा ।

कैलारी गाउँपालिका स्वास्थ्य शाखाके आयोजना तथा केयर नेपाल, आइडिइ नेपाल, म्याप इन्टरनेशनलके आर्थिक सहयोग ओ याक नेपालसे पोषण परियोजनाके सहकार्यमे समिक्षा कार्यक्रम हुइल हो ।

गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ पोषणके अवस्थाबारे समिक्षा कार्यक्रम महत्वपूर्ण रहल बटैली । उहाँ कहली, ‘पालिकामे बालबालिकाहुकनहे कुषोषणके कारण लग्न टमान रोगसे बचाइक लाग पोषण आवश्यक रहल बटैली ।

कार्यक्रममे सहजीकरण कैलारी गाउँपालिका स्वास्थ्य शाखा प्रमुख नरेशकुमार चौधरी कैलारीमे पोषणके अवस्था सुधार हुइटी गैल बटैलै । उहाँ कहलै, ‘गैल माघ महिनामे वृहत पोषण लेखाजोखा कार्यक्रम संचालन कैगिल रहे । यी अभियानमे ६ महिनासे पाँच बर्षसमके पोषण लेखा जोखा कैगिल रहे । ओम्ने साम खालके कुपोषण ११ जाने, माध्यम खाले ९९ जाने रहल भेटल रहे ।’
कार्यक्रममे कैलारी सक्कु वडामे रहल स्वास्थ्य संस्थासे दुसरा त्रैमासिम प्रगती पालिक पाला प्रस्तुतीकरण करल रहिट ।