कार्यबाहक मुख्यमन्त्रीके जिम्मेवारी आर्थिकमन्त्री थापाहे
पहुरा समाचारदाता
धनगढी, १६ वैशाख । सुदूरपश्चिमके कार्यबाहक मुख्यमन्त्रीके जिम्मेवारी आर्थिक मामिलामन्त्री बहादुरसिंह थापा सम्हरले बटै । बैशाख १६ गते भारत भ्रमणमे गैल मुख्यमन्त्री कमलबहादुर शाह अपने भारतमे रहटसमके लाग कार्यबाहक मुख्यमन्त्रीके जिम्मेवारी थापाहे डेहल हुइट ।
बजेट तयारीके संघारमे भारतमे भ्रमणमे निकरल शाह यी बेला आपन भारत भ्रमणसे बजेट तयारीमे असर नैपर्ना बटैलै । “कार्यबाहक मुख्यमन्त्रीके जिम्मेवारी मै आर्थिक मन्त्रीहे डेहल ओरसे बजेटके तयारीमे कौनो समस्या नैरही” उहाँ कहलै । भारत सरकारके आमन्त्रणमे मुख्यमन्त्री शाह नेतृत्वके १० सदस्यीय टोली भारत प्रस्थान हुइल बावै । टोलीसे एक अँठ्वारसम दिल्ली, देहरादुन ओ लखनऊमे बिटैना जनाइल बावै ।
भ्रमणके क्रममे मुख्यमन्त्री शाह दिल्लीमे संघीय मन्त्री, उत्तराखण्डके मुख्यमन्त्री पुष्करसिंह धामी, उत्तर प्रदेशके मुख्यमन्त्री योगी आदित्यनाथसँग भेटवार्ता कैना कार्यक्रम रहल बावै ।
