मुख्यमन्त्री शाहके नेतृत्वमे १० सदस्यीय टोली भारत प्रस्थान
पहुरा समाचारदाता
धनगढी, १६ बैशाख । सुदूरपश्चिम प्रदेशके मुख्यमन्त्री कमलबहादुर शाहके नेतृत्वमे १० सदस्यीय भ्रमण टोली भारत ओर प्रस्थान करले बावै ।
भारत सरकारके निमन्त्रणामे मंगरके टोली त्रिभुवन अन्तराष्ट्रिय विमानस्थल काठमाण्डौंसे एक अँठ्वारके लाग भारत भ्रमणमे गैल हो । डुनु देशके ओरसे मुख्यमन्त्री स्तरिय औपचारिक विदेश भ्रमण पहिलचो हुइ जैटी रहल बावै । बैशाख १६ गतेसे २२ गतेसमके भ्रमणके समय तालिका रहल बावै ।
भारत भ्रमण जैनासे आघे त्रिभुवन अन्तराष्ट्रिय विमानस्थलमे पत्रकारहुक्रनसे संक्षिप्त बातचित कैटी मुख्यमन्त्री शाह प्रदेश सरकारसे आयोजना करे जैटी रहल लगानी सम्मेलन, उर्जा, पर्यटन, कृषिलगायतके विषयमे छलफल हुइना बटैलै । टोलीसे भारतके दिल्ली, देहरादुन, अयोध्या ओ लखनउ लगायतके ठाउँके भ्रमण कैना जनाइल बावै ।
पहिल दिन भ्रमण टोली काठमाडौँसे हवाईमार्ग होके दिल्ली जैना बावै, डोसर दिन दिल्लीमे संघीय मन्त्रीसँगके भेटघाट, विवेकानन्द अन्तराष्ट्रिय फाउण्डेसन संघसँग अन्तरक्रिया रहल बावै । टोलीसे भारतिय कृषि अनुसन्धान संस्थाके भ्रमण, अयोध्याके धार्मिक पर्यटकिय क्षेत्रके भ्रमण, देहरादुनके कृषि क्षेत्र सहित पर्यटकिय क्षेत्रके भ्रमण, उत्तरखण्ड मुख्यमन्त्री तथा कृषिमन्त्रीसँगके भेट पश्चात लखनउसे स्थलमार्ग हुइटी कैलाली अइना कार्यक्रम तय रहल बटै ।
भ्रमण टोलीमे प्रदेश सरकारके भूमि, व्यवस्था, कृषि तथा सहकारी मन्त्री वीरबहादुर थापा, पूर्वमन्त्री एवं नागरिक उन्मुक्ति पार्टीके संसदीय दलके नेता घनश्याम चौधरी, पूर्वमन्त्री एवं नेकपा (एकीकृत समाजवादी) के प्रमुख सचेतक नरेशकुमार शाही, नेकपा (माओवादी केन्द्र) के प्रदेश सभा सदस्य झपटबहादुर साउँद, नीति तथा योजना आयोगके सदस्य शेरबहादुर भण्डारी, प्रदेशके मुख्य सचिव डा. कमलप्रसाद पोखरेल, भौतिक पूर्वाधार विकास मन्त्रालयके सचिव सुरतकुमार बम, मुख्यमन्त्रीके राजनीतिक सल्लाहकार डा. जितु उपाध्याय ओ स्वकीय सचिव रामबहादुर विष्ट भ्रमण टोलीमे रहल बटै ।
