विपदके बेला बालबालिकासे सबसे ढेर प्रभावितः गापा उपाध्यक्ष भगवती

पहुरा समाचारदाता
हसुलिया २२ बैशाख । कैलारी गाउँपालिकाके हसुलियामे निशुल्क गुणस्तरीय सार्वजनिक शिक्षा सम्भव छ, सन्दर्भः शिक्षाका लागि विश्वव्यापी कार्यसप्ताहः२०८२ अन्र्तगत बालिका तथा समावेशी शिक्षा संजाल सम्बन्धी छलफल अँटवारके रोज सम्पन्न हुइल बा ।

कैलारी गाउँपालिकाके समन्वयमे पिसविन (शान्ति) कैलालीके आयोजना तथा एनसिई नेपालके सहकार्यमे बालिका तथा समावेशी शिक्षा संजाल सम्बन्धी छलफल हुइल हो । कैलारी गाउँपालिका स्तरीय बाल समितिके संयोजक तथा गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे विपदके बेला सबसे ढेर प्रभावित बालबालिका परल बटैली । उहाँ कहली, ‘आजकाल्हके मनै भौतिक सुविधाके खोजीमे अपनही विपद निम्टयाइना करल बटै । जेकर कारण अपनही विपदमे परलके ज्यान गुमैठै । समय समयमे प्राकृतिक अइना करठ जेम्ने बालबालिका, जेष्ठ नागरिक, गर्भवती महिलाफे प्रभावित हुइल विल्गाइठ ।‘

कैलारी गाउँपालिकामे बर्खाके बाढसे डुबान, पटान खेती योग्य जमिन कटान, गर्मीके बेला आँधीबौखा, आगलागीके समस्या ओ चटयाङके समस्या भोग्टी आइल ओरसे विपद न्यूनिकरणके लाग विपद अइनासे पहिले सचेत हुइना उहाँ आग्रह करली । ओस्टेक करके गुणस्तरीय शिक्षाके विद्यालयके शिक्षकसंगे अभिभावक जिम्मेवार हुई पर्ना बटैली ।

बालबालिका विद्यालय भर्ना कैटीके मोर जिम्मेवारी ओराइल कना सोचहे दुर रख्टी आपन लर्कनके भविष्यप्रति चिन्तन हुई पर्ना उहाँ बटैली । गुणस्तरीय शिक्षाके लाग अपाङता रहल बालबालिका, संरक्षण विहिन बालबालिकाहुकनहे समेटना जरुरी रहलफे गाउँपालिका उपाध्यक्ष बटैली ।

कार्यक्रममे गाउँपालिकाके सामाजिक विकास शाखा प्रमुख यगम कलेल विपद ओ कैलारी गाउँपालिकासे कैगिल प्रयासबारे प्रस्तुतीकरण करल रहिट । प्राकृतिक ओ मानव निर्मित विपदके बारे जानकारी डेटी कैलारीमे सबसे ज्याद बाढके समस्या रहल मने विद्यालय बन्द करे पर्ना अवस्था नैरहल बटैलै । कैलारी गाउँपालिकामे हुलाकी राजमार्गमे पानी निकास नैहुइल कारण रोडके उत्तरओर समस्या डेखल उहाँ जनैलै ।

ओस्टेक उहाँ कैलारी विपद न्यूनिकरणके लाग पालिकास्तरीय समिति गठन करल, समय समय बैठक संचालन करल, खोज उद्धार सामाग्रीके व्यवस्थापन करल बटैलै ।

कार्यक्रममे सहजीकरण करटी पिसविन कैलालीके संयोजक हर्क बहादुर ओली समावेशी शिक्षाके लाग विद्यालयके भौतिक संरचनामे ध्यान जैना जरुरी रहल बटैलै । ध्वनी प्रदुशन, बायू प्रदुशनके कारण बालबालिकाहुकनहे स्वतन्त्र रुपमे अध्ययनके समस्या डेखल उहाँ जनैलै । छोटहीमेसे बालबालिकामे मोबाइलके लट बैठल कारण आटिज्मके समस्या बह्रलफे उहाँ जनैलै ।

कैलारी गाउँपालिका महिला तथा बालबालिका शाखा प्रमुख बालकुमारी चौधरी कैलारीमे रहल अपाङता रहल बालबालिकाहुकनहे सुचिकरण अभियान संचालन करल जनैली ।
ओस्टेक उहाँ संरक्षण विहिन बालबालिकाके शिक्षा सिकाईमे टेवा पुगे कहटी प्रत्येक बरस शैक्षिक सामाग्री सपोट करटी आइल जनैली । पहर्नाके उमेरके बालबालिका कुलट ओ दुव्र्यशनीमे फस्टी गैल ओरसे सचेतना आवश्यक रहल उहाँ बटैली ।

कार्यक्रममे एनसिईके सरिता थापा कैलारी गाउँपालिकाके दिपेन्द्र मावि, राष्ट्रिय मावि ओ जनता माविमे बालिका तथा समावेशी शिक्षा सम्बन्धी कार्यक्रम कैना उहाँ जनैलै ।

बालिका तथा समावेशी शिक्षा संजाल सम्बन्धी छलफल कार्यक्रममे स्वागत मन्तव्य कैलारी गाउँपालिका शिक्षा शाखा प्रमुख गणेश प्रसाद मिश्र करल रहिट । कार्यक्रममे पालिका स्तरीय बाल समितिके सदस्यहुकनके सहभागिता रहल रहे ।