टिसरा तहके एक महिने सिलाई कटाई तालिम सुरु

पहुरा समाचारदाता
हसुलिया, २२ बैशाख । कैलारी गाउँपालिकाके हसुलियामे एक महिने टिसरा तहके सिलाई कटाई तालिम सुरु हुइल बा ।

कैलारी गाउँपालिकाके सहयोगमे शसक्त आवाज महिला संस्थाके आयोजनामे उपाध्यक्ष समावेशी कार्यक्रम अन्र्तगत एक महिने निशुल्क तालिम सुरुवाट हुइल हो । संस्थाके अध्यक्ष गीता चौधरीके अध्यक्षतामे हुइल तालिम उदघाटन कार्यक्रमके प्रमुख अतिथि कैलारी गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे सम्बोधन करटी उहाँ सीपसे महिलाहुकनहे आत्मनिर्भर बनैना बटैली ।

उहाँ कहली, ‘जौन महिलाके हातमे सीप बा । ओइने अपनही व्यवसाय संचालन करटै कलेसे ओइनके समाजमे, परिवारमे अलग मेरिक पहिचान बा । ओइनके मान सम्मानफे बा ।’

गाउँपालिकासे वेरोजगार महिला ओ यूवाहुकनहे स्वरोजगार बनाइक बनाइक लाग टमान मेरिक सीपमुलक तालिम संचालन करटी आइल बा, तालिम लेके सीपके सदुपयोग कैना उहाँ सक्कु जनहन आग्रह करली ।

महिलाहु्कनहे दोहरो जिम्मेवारी निभाई पर्ना मने घरपरिवार ओ समाजसे हिंसा भोगे परटी आइल कहटी महिलाहुक्रे आत्मनिर्भर हुइलेसे केल लैगिक हिंसाके घटनामे न्यूनिकरण हुइना उहाँ बटैली ।

कार्यक्रममे विशिष्ट पहुना गाउँपालिकाके प्रमुख प्रशासकीय अधिकृत खगेन्द्रराज जोशी ओ सामाजिक विकास शाखा प्रमुख यगम कलेसे शुभकामना मन्तव्य रख्टी तालिम लेके ढेर जैसिन मनै खाली घर बैठना करल ओरसे सीप सिखके सीपके सदुपयोग कैना आग्रह करल रहिट । तालिममे सक्रिय सहभागि हुके आपन क्षमता बह्रैना आग्रह करलै ।

कार्यक्रममे गाउँपालिकाके लेखा शाखा प्रमुख दिपेद्र चौधरी, ओरेक नेपाल कैलालीके जिल्ला संयोजक गीता चौधरी, थारु महिला संजालके जिल्ला अध्यक्ष सरिता चौधरी, संजालके सदस्य, शसक्त आवाज महिला संस्थाके सदस्यहुकनके सहभागिता रहे ।

तालिममे दुसरा चरणके प्रमाणपत्र प्राप्त करके व्यवसाय संचालन करटी आइल १० जाने महिलाहुक्रनके सहभागिता रहल बा ।
तालिम उदघाटन कार्यक्रमके संचालन सदस्य अनिता चौधरी ओ स्वागत मन्तव्य दुसर सदस्य अनिता चौधरी करल रही । तालिममे लेहंगा, गाउन, आसकोट, व्लाउज, ओ टमान मेरिक डिजाइन सिखजैना बा ।