विपन्न महिलाहे लेहेंगा चोली सिल्ना तालिम
पहुरा समाचारदाता
सुखड, २५ वैशाख । कैलालीके घोडाघोडी नगरपालिका–७ हरिनगरके महिलाहुक्रनहे थारु लेहेंगा चोली सिल्ना तालिम डेहल बावै ।
विपन्न महिलाहे सीप सिखाके आत्मनिर्भर बनैना उद्देश्यसे तालिम सञ्चालन करल हो । नगरपालिकामे रहल गरिबी निवारणके लाग लघु उद्यम विकास कार्यक्रम (मेड्पा) के आयोजनामे ४५ दिने तालिम सञ्चालन करल हो ।
चैत्र ६ गतेसे बैशाख २० गतेसम तालिम सञ्चालन हुइल तालिमके एक कार्यक्रमके बिच समापन करगिल बावै । नगर प्रमुख खडकबहादुर रावतके बर्का पहुनाइमे सम्पन्न हुइल हो । उहे कार्यक्रममे तालिममे विपन्न वर्गके १५ जाने थारु महिलाहुक्रनहे प्रमाणपत्र वितरण करल रहे ।
समापन कार्यक्रममे बोल्टी नगर प्रमुख रावत तालिमसे सिखल चिज पूर्ण रूपमे व्यवहारमे लागु करे पर्ना सहभागीनहे आग्रह करल रहिट । उहाँ कौनो फेन सीप सिकलपाछे पेसा तथा व्यवसाय सञ्चालन कैके सफल उद्यमी बने सेकजैना बटाइल रहिट । यकरसाथे यहाँ तालिमसे महिलाहुक्रनहे आय आर्जन कैनामे ढेर सहयोग पुग्ना बटाइल रहिट । सीप सिखसेकल ओरसे लेहेंगा चोली बनैना कार्यहे व्यावसायिक रूपमे आघे बह्रैना सहभागीनहे नगर प्रमुख रावत आग्रह करल रहिट ।
साथे उहे बिच २० प्रतिशत अनुदानमे १५ ठो सिलाई कटाई मेसिन समेत वितरण करल रहे । वडा नम्बर २ के कार्यवाहक वडा अध्यक्ष देव चरण चौधरीके घरगोसियाइमे कार्यक्रम हुइल रहे । कार्यक्रममे खास पहुनामे उपप्रमुख गुलिया कुमारी चौधरी ओ शिक्षा शाखा उप सचिव खगेन्द्रबहादुर सिंह रहल रहिट । कार्यक्रमके सञ्चालन लघु उद्यम विकास कार्यक्रमके सहजकर्ता जुगिना चौधरी करल रही ।
थारु समुदायके महिला टरटिहुवारमे विशेष रूपमे पहिरना लेहेंगा चोलीके प्रयोग हाल चलचित्र, म्युजिक भिडियो लगायतमे प्रयोग हुइ लागलपाछे पाछेक समय यकर माग बह्रल बावै । लेहेंगा चोली पहिरना थारु युवतीसँगे अन्य समुदायके महिला फेन अग्रसर हुइ लागल बटै ।
