रोटरी जर्नो अवार्डसे पत्रकार उन्नती चौधरी पुरस्कृत

पहुरा समाचारदाता
धनगढी, ४ जेठ । रोटरी इन्टरनेसनल डिस्ट्रिक्ट ३२९२ नेपाल–भुटानसे आयोजित रोटरी जर्नो अवार्ड २०२४–२०२५ से पत्रकार उन्नती चौधरीसहित सात जाने पुरस्कृत हुइल बटै ।

मानसिक तथा बाल स्वास्थ्यके क्षेत्रमे काम करल कहटी उन्नति चौधरी, खोजी पत्रकारिताके क्षेत्रमे क्रियाशील पत्रकार अनिता भेटवाल, स्वास्थ्य क्षेत्रमे पत्रकारिता करल कल्पना आचार्य, सरसफाइ तथा खानेपानीके क्षेत्रमे काम करल सागर परियार, आधारभूत शिक्षा तथा साक्षरताके क्षेत्रमे क्रियाशील रहल नारायण किलम्बु, पवन वर्षा शाह ओ स्वतन्त्र फोटु पत्रकार विकास रौनियारहे पुरस्कृत करल हो । पुरस्कारके राशी रु ५१ हजार रहल बा ।

‘लाइफटाइम एचिभमेन्ट अवार्ड’से पत्रकार कोइराला पुरस्कृत

रोटरी ‘लाइफ टाइम एचिभमेन्ट अवार्ड’से अग्रज पत्रकार भारदत्त कोइराला पुरस्कृत हुइल बटै । रोटरी इन्टरनेसनल डिस्ट्रिक्ट ३२९२ नेपाल–भुटानद्वारा आयोजित रोटरी जर्नो अवार्ड २०२४–२०२५ मे अग्रज पत्रकार कोइरालाहे रु एक लाख एक हजार राशिके रोटरी लाइफ टाइम एचिभमेन्ट अवार्डसे पुरस्कृत करल हो ।

नेपालमे नम्मा समयसम पत्रकारिता तथा सञ्चारके क्षेत्रमे योगदान पुगैना व्यक्तिहे सम्मान कैना उद्देश्यसे स्थापना करल कहटी उ पुरस्कार अघिल्का वर्ष स्व.भैरव रिसालहे प्रदान करल रहे । नेपालके पत्रकारिता क्षेत्रमे योगदान पुगैना अग्रज पत्रकारहे हरेक वर्ष सम्मान कैना उद्देश्यसे सुरेस आचार्य ओ प्रभात योञ्जनसे पुरस्कारके लाग योगदान करल रहिट ।

रोटरी इन्टरनेसनल डिस्ट्रिक्ट ३२९२ नेपाल–भुटानके डिस्ट्रिक्ट गभर्नर राजेन्द्रमान श्रेष्ठसे रोटरीके बारेमे सर्वसाधारणमे सकारात्मक प्रभाव विकास होए कना अभिप्रायसे पुरस्कारके सुरुआत करल बटैलै । उहाँ फेब्रुअरीमे हु्इना डिस्ट्रिक्ट सम्मेलनमे खानेपानी तथा सरसफाइके क्षेत्रमे काम कैना उत्कृष्ट पत्रकारहे रु २० लाखके पत्रकारिता पुरस्कार प्रदान कैना जानकारी करैलै । सम्मानित व्यक्तित्व अग्रज पत्रकार भारदत्त कोइरालासे पत्रकारिता क्षेत्रमे अपने पुगाइल योगदानके कदर करटी सम्मान करलमे खुसी व्यक्त करलै ।

नेपाल पत्रकार महासंघके वरिष्ठ उपाध्यक्ष दीपक आचार्य नेपाली पत्रकारितासे समाजके रूपान्तरणमे करल योगदानहे सम्मान कैना करल यी कदम महत्वपूर्ण रहल बटैलै । उहाँ नेपाली पत्रकारिता विश्वमे गर्व कैना लायक बनैना प्रयास कैना क्रियाशील पत्रकारहुकनहे पुरस्कृत ओ सम्पन्न कैना महत्वपूर्ण कदम रहल धारणा रख्लै ।

रोटरी जर्नो अवार्ड कार्यक्रमके अध्यक्ष नम्रता शर्मा पुरस्कारके लाग ५० ठोसे ढेर आवेदन परल उल्लेख करटी उ आवेदनमध्येसे सात विधामे सात जनहनहे चयन करल हो ।