नवनियुक्त मन्त्री चौधरीसे पद तथा गोपनीयताके सपथ
पहुरा समाचारदाता
धनगढी, ४ जेठ । सुदूरपश्चिम प्रदेश सरकारके नवनियुक्त उद्योग, पर्यटन, वन–वातावरण मन्त्री रामेश्वर चौधरी पद तथा गोपनीयताके सपथ लेले बटै ।
धनगढीस्थित प्रदेश प्रदेश प्रमुखके कार्यालयमे आयोजित समारोहमे प्रदेश प्रमुख नजिर मियाँे नवनियुक्त मन्त्री चौधरीहे पद तथा गोपनीयताके शपथग्रहण करैलै । नागरिक उन्मुक्तिके प्रदेश सभा सदस्य रहल चौधरीहे यी आघे अँटवारके रोज मन्त्रीमे नियुक्त कैगिल रहे ।
रकम लेनदेनके अडियो सार्वजनिक हुइलपाछे तत्कालीन वन मन्त्री लक्ष्मण किशोर चौधरी एक महिना आघे पदसे राजीनामा डेहल रहिट । सपथ ग्रहण समारोहमे मुख्यमन्त्री कमलबहादुर शाह, सभामुख, मन्त्रीगण, प्रदेश सभा सदस्य, उच्च सरकारी अधिकारी लगायतके सहभागिता रहल रहे ।
मन्त्रीके विषयमे नागरिक उन्मुक्ति भिटर विवाद उत्पन्न हुइल रहे । पार्टी अध्यक्ष रन्जिता श्रेष्ठसे प्रदेश सभा सदस्य कैलाश चौधरीहे मन्त्री बनैना डेहल निर्देशन लटयटी संसदीय दलसे रामेश्वर चौधरीहे वन मन्त्रीके लाग सिफारिस करल रहे । उहाँहे मन्त्रीमे सिफारिस करपाछे दुसर प्रदेश सभा सदस्य खुसीराम चौधरी शपथग्रहण रोक्न माग करटी पत्राचार करल रहिट ।
