थारु समुदायसे गोदावरीके नगर प्रमुखहे ज्ञापनपत्र
पहुरा समाचारदाता
धनगढी, ६ जेठ । गोदावरी नगरपालिका वडा नं ८ के वडा भेलाके अवसरमे मझगाउँ थारु संग्रहालयसे नगर प्रमुख विरेन्द्र भट्टहे टमान माग समेटल ज्ञापनपत्र बुझैले बा ।
ज्ञापनपत्र मार्फत गोदावरी नगरपालिकासे थारु समुदायके भाषा, कला, संस्कृति, भेषभूषा ओ परम्परागत प्रणालीके संरक्षण तथा प्रवद्र्धनके लाग आवश्यक सहयोग करडेना आग्रह करटी ज्ञापन पत्र बुझाइल हुइट ।
ज्ञापनपत्रमे मझगाउँस्थित थारु संग्रहालयके प्रांगणमे विगत १४ वर्षसे माघ महोत्सव आयोजना हुइटी आइल बा । प्रारम्भमे पूर्व श्रीपुर गाविसस्तरीय रूपमे सुरु करल महोत्सव पछिल्ला ९–१० वर्षसे मझगाउँमे गोदावरी नगरस्तरीय रूपमे मनैटी आइल बा । उ महोत्सव स्थानीय कला, संस्कृति ओ पर्यटन प्रवद्र्धनमे महत्वपूर्ण योगदान डेटी आइल जनाइल बा ।
थारु समुदायमे परापूर्वकालसे चल्टी आइल भल्मन्सा, सोरहिनीया, गुरुवा, वैदुवा जैसिन परम्परागत प्रथाके संरक्षण करटी उहीहे कानूनी मान्यता डेना ओ व्यवस्थापन कैना माग फे ज्ञापनपत्रमे उल्लेख करल बा । माघ महोत्सवके लाग बजेट विनियोजन कैना, थारु संग्रहालय ओ मझगाउँ थारु सामुदायिक होमस्टेके प्रवद्र्धनके लाग आवश्यक सहयोग पुगैना माग करल बा । ज्ञापनपत्र थारु कल्याणकारिणी सभा गोदावरी नगर समिति, गोदावरी नगरस्तरीय बरघर भल्मन्सा समिति, ओ मझगाउँ थारु सामुदायिक होमस्टे समितिके संयुक्त पहलमे बुझाइल रहे ।
वडा नं ८ के बजेट ९४ लाख २४ हजार ८२३ रुप्या
गोदावरी नगरपालिका वडा नं ८ के अइना आर्थिक वर्ष २०८२/०८३ के बजेट सार्वजनिक हुइल बा ।
मंगरके रोज वडासे आयोजित नवौं वडा भेलामे नगर प्रमुख विरेन्द्र भट्टके प्रमुख अतिथी ओ उप–प्रमुख शारदादेवी रोकायाके विशिष्ठ अतिथिमे वडाध्यक्ष गोविन्द चौधरी अइना आ ब ०८२/०८३ के ९४ लाख २४ हजार ८ सय २३ रुप्या बजेट सार्वजनिक करल हुइट ।
ओस्टेक करके वडा भेलामे वडाध्यक्ष गोविन्द चौधरीसे अइना आ ब ०८२/०८३ के प्रस्तुत करल नीति तथा कार्यक्रम अन्तर्गत गोदावरी नगरपालिकासे प्राप्त बजेट सिलिङ्ग अनुसार समानीकरण बजेट ७० लाख ओ सूत्रमे आधारित बजेट २४ लाख २४ हजार ८२३ रहल जानकारी डेलै ।
ओस्टेक करके आ व ०८२/०८३ मे सञ्चालन हुइना निति तथा कार्यक्रम अन्तर्गत भौतिक पूर्वाधार विकासमे ६१ लाख २४ हजार ८२३, सामाजिक विकासओर १२ लाख, आर्थिक विकास ओर १२ लाख, वातावरण तथा विपद् व्यवस्थापनओर २ लाख, सुशासन तथा संस्थागत विकासओर ७ लाख विनियोजन करल जानकारी डेलै ।
बजेट जनताके आवश्यकता ओ सुझावके आधारमे टमान शीर्षकमे विभाजन करके कार्यक्रम सञ्चालन कैना हुइल बा । साथे योजना पारदर्शी ढंगसे कार्यान्वयन कैना जेम्ने पूर्वाधार, शिक्षा, स्वास्थ्य, कृषि तथा रोजगारी सिर्जना, सीपमुलक तालिम जैसिन क्षेत्रहे बजेटके मुख्य आधार बनाइल जनाइल बा ।
ओस्टेक वडासे उपलब्ध सेवासे वैशाख ३१ गते सम १९ लाख १३ हजार २७८ रुप्या बराबरके राजश्व संकलन करल जनाइल बा ।
