आमसञ्चार विधेयक उपर छलफल
पहुरा समाचारदाता
धनगढी, ७ जेठ । सुदूरपश्चिम प्रदेशमे आमसञ्चार सम्बन्धमे व्यवस्था कैना बनल विधेयक उपर छलफल हुइल बावै ।
आन्तरिक मामिला तथा कानून मन्त्रालयके आयोजनामे हुइल छलफलमे यहाँके मिडिया हाउसके सञ्चालक तथा मिडियाकर्मीनसे रचनात्मक सुझाव डेगैल बावै ।
वरिष्ठ पत्रकार मनमोहन स्वाँर आमसञ्चार सम्बन्धमे व्यवस्था कैना बनल विधेयकके प्रस्तावना संकुचित रहल ओरसे ओम्ने सक्कु विषयबस्तुहे समेटे पर्ना औँल्याइल रहिट ।
ओस्टके वरिष्ठ पत्रकार चित्राङ्ग थापा परिच्छेद २ के समितिके गठन, काम, कर्तव्य ओ अधिकार अन्र्तगत उफदफा २ के (क)मे रहल मन्त्री, सञ्चार सम्बन्धी विषय हेर्ना मन्त्रालय व्यक्ति अध्यक्ष हुइना प्रावधानहे हेरफेर करे पर्ना बटाइल रहिट । उहाँ समितिके अध्यक्षमे मन्त्री रहलेसे सरकार फेरबदल हुइलेसे समस्या हुइना बटाइल रहिट ।
ओस्टके उहाँ यहाँके भौगोलिक क्षेत्र अनुसार मिडियाहे डेजैना लोककल्याणकारी विज्ञापन, अनुदान लगायतके विषयमे फेन ध्यान डेहे पर्ना बटाइल रहिट ।
सञ्चार रजिष्ट्रार सम्बन्धी व्यवस्थामे सञ्चार रजिष्ट्रारके योग्यता, उमेरमे फेन हेरफेर हुइ पर्ना बटाइल रहिट । नेपाल पत्रकार महासंघ कैलाली अध्यक्ष श्रवण देउवा सञ्चार रजिष्ट्रार सम्बन्धी व्यवस्थामे सञ्चार रजिष्ट्रारके योग्यता आमसञ्चारमे स्नाकोत्तर ओ कम्तीमे पत्रकारिता क्षेत्रमे पन्ध्र बरसके अनुभव हुइ पर्ना बटाइल रहिट ।
नेपाल आदिवासी जनजाति पत्रकार महासंघके सुदूरपश्चिम प्रदेश अध्यक्ष उन्नती चौधरी अनलाइन सञ्चार माध्यमके दर्ता, नवीकरण लगायतके कार्य झन्झटिल रहल कहटी ध्यानाकार्षण कराइल रही ।
ओस्टके कार्यक्रममे उपस्थित अन्य सञ्चारकर्मीहुक्रे फेन आमसञ्चार विधेयक उपर धारणा राखल रहिट । कलेसे उहाँहुक्रे हालीसे हाली उ ऐनहे पारित कैके कार्यान्वयन फेन कैना औंल्याइल रहिट ।
कार्यक्रमके बर्का पहुना तथा आन्तरिक मामिला तथा कानून मन्त्री हिरा सार्की आमसञ्चार विधेयक उपर आइल सल्लाह सुझावहे सकारात्मक रुपमे लेहल बटैलै । उहाँ आइल सल्लाह सुझावहे फेनसे आमसञ्चार विधेयकमे थप कैटी फेनसे पत्रकारहुक्रनसे अन्तरक्रियाके साथे सल्लाहसुझाव लेटी प्रदेश सभामे पेश कैना बटैले बटै ।
कार्यक्रममे नेपाल पत्रकार महासंघ सुदूरपश्चिम प्रदेशके अध्यक्ष भरत शाह कार्यक्रम सहभागिता जनाके मिडिया विधेयक उपर सल्लाह सुझाव डेहुइया सक्कु सञ्चारकर्मीहुक्रनहे धन्यवाद डेटी मिडिया विधेयक अइलेसे मिडिया सञ्चालनके साथे विचार ओ अभिव्यक्ति स्वतन्त्रतता तथा सूचना ओ सञ्चारके हकके संरक्षण हुइना विश्वास व्यक्त करल रहिट ।
ओस्टके उहाँ उहीसे प्रदेशमे सञ्चालनमे रहल आम सञ्चार माध्यमहे स्वतन्त्र, मर्यादित ओ जिम्मेवार बनैना बटाइल रहिट ।
