सीपले महिलाहुकन आत्मनिर्भर बनाइठः गापा उपाध्यक्ष भगवती

पहुरा समाचारदाता
हसुलिया, १३ जेठ । थारु महिला सीप पुस्तान्तरण तथा प्रवद्र्धन कार्यक्रम अन्र्तगत कैलारी गाउँपालिका वडा नम्बर ५ मे एक महिने लेहंङगा सिल्ना तालिम सुरु हुइल बा ।

सुदूरपश्चिम प्रदेश सरकार सामाजिक विकास मन्त्रालय शिक्षा निर्देशनालय सामाजिक विकास कार्यालय कैलालीके आष्योजनामे एक महिने लेहंङगा सिल्ना तालिम सुरु हुइल हो ।

कैलारी गाउँपालिका उपाध्यक्ष भगवतीकुमारी चौधरीके वरका पहुनामे हुइल तालिममे उहाँ सीपले महिलाहुकनहे आत्मनिर्भर बनैना बटैली । उहाँ कहली जेकर हाथेम सीप बा उ सीपके सदुपयोग कैके आर्थिक रुपमे बल्गर बनेसेकजाइठ । घर खर्च चलैना सहजुल हुइठ । घरपरिवारहे बल्गर बनाइसेकठ ।

कैलारी गाउँपालिकामे महिला लक्षित कार्यक्रम ढेर करले बाटी, उहाँ कहली, ‘महिला सशक्तीकरणके लाग विद्यालय छोरल लउण्डीनहे कुसन बनैना तालिम, अपाङता रहल व्यक्ति तथा महिलाहुकनहे बेताबाँससे निर्माण हुइना मुडालगायत सामाग्री बनैना तालिम, व्याग बनैना तालिम, प्लाष्टिकसे बनल बस्तु हटाइक लाग गैल बर्ष ढकिया, डालो, बास्केट बनैना तालिम डेहल रहे । ओ यी बरष फेरसे एक महिने ढकिया, डालो, बास्केट बनैना तालिम सुरु हुइल बा ।’

तालिममे कोई कोई भोज करलफे नैहुइबी । कोई विद्यालय छोरल हुइबी । आर्थिक अभावके कारण पढे नैसेक्नाफे हमार अवस्था बा । गाउँघरमे खेती किसानी कैके गुजारा कैना अवस्था रहठ, गाउँपालिका उपाध्यक्ष कहली ।

हरेक महिलाके थेन एक जोर थारु समुदायके परम्परागत पहिरन लेहंङगा हुइना जरुरी बा । हम्रे चार÷पाँच हजार रुप्या तिरके उ लेहंङगा खरिद कैठी । हम्रे अपनही सिए काहे नैसिख्ना टे । अपनही सिए सिख्लेसे व्यवसायिक बनाके आम्दानीके स्रोत बनाइ सेक्जाइठ । दुसर ओरसे थारु महिला सीप पुस्तान्तरण हुई सेकठ ।

पहिले पहिले थारु लेहंङगा सिल्ना प्रशिक्षक बाहेरसे ल्याने परे अब्बे अपने गाउँठाउँक प्रशिक्षक तयार हुइल बटै । प्रशिक्षक बने सेक्नाके साथे सीप सिखके चार÷पाँच जाने मिल्के लेहंङगा चोलिया बनाके व्यवसायिक रुपमे आगे बह्रे सेक्ना उहाँ बटैली ।
कैलारी गाउँपालिका थारु महिलाके परम्परागत पहिरन लेहंङगा मिल्ना ठाउँ बनैना जरुरी बा । गाउँपालिकासे ढेर महिलाहुकनके तालिमफे प्रदान कैसेकल बा । उहाँहुक्रे सीपके सदुपयोग कैलेसे व्यवसाय करही टे आर्थिक रुपमे बल्गर बने सेक्ही ।

सामाजिक विकास कार्यालय कैलालीके महिला विकास अधिकृत प्रतिभा श्रेष्ठ महिला सीप पुस्तान्तरण तथा प्रवद्र्धन कार्यक्रम अन्र्तगत यी पालिकाके नौ वडाके महिलाहुकन तालिम डेटी रहल जनैली ।

लक्षित बर्ग कार्यक्रम अन्र्तगत यिहीसे आघे बंगर पालन, मुरगी पालन, फास्टफ्ुडके तालिम संचालन करल रहे । उहाँ कहली, ‘कैलारीमे पालिकाके सक्कु वडाहे समेटके थारु महिला सीप पुस्तान्तरणके लेहंङगा सिल्ना तालिम सुरु करल हो । परम्परागत सीपहे संरक्षण करटी लौवा पुस्तामे हस्तान्तरणफे होए । सीप सिखके व्यवसायिक रुपमे आघे बह्रटी आर्थिक रुपमे बल्गर बनाई सेक्ना कहटी तालिम सुरुवाट करल हो ।

तालिममे सक्रियता पूर्वक सहभागी हुके सीपके सदुपयोग करलेसे केल तालिम करुवाइलके फाइदा महिला विकास अधिकृत श्रेष्ठ कहली ।

कैलारी गाउँपालिका वडा नम्बर ५ के वडा सदस्य तथा कार्यवाहक वडा अध्यक्ष भागुदास चौधरीके अध्यक्षतामे हुइल कार्यक्रममे उहाँ तालिम सिखके व्यावसायिक रुपमे आघे बह्रना आग्रह करलै । व्यवसाय करलेसे आर्थिक स्रोत बन्ना कहटी सक्रिय सहभागिताके जनाडेनाफे आग्रह करलै ।

कार्यक्रमके संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रही । थारु महिला सीप पुस्तान्तरणके सुरु हुइल एक महिने लेहंङगा सिल्ना तालिममे धनिता चौधरी प्रशिक्षण डेटी रहल बटी । तालिममे सक्कु वडाके समेटके २० जाने महिलाहुकनके सहभागिता रहल बा । तालिम कैलारी गाउँपालिका वडा नम्बर ५ के कार्यालयके तालिम हलमे संचालन हुइटी रहल बा ।