यौनिक अल्पसंख्यक समुदायके सवालमे छलफल
पहुरा समाचारदाता
धनगढी, १५ जेठ । यौनिक अल्पसंख्यक समुदायके सवालमे मिडियाके भूमिका सम्बन्धि छलफल कार्यक्रम बिफेक रोज धनगढीमे हुइल बा । यौनिक अल्पसंख्यक समुदायके सवालमे पैरवी कैटी आइल एकता नेपालके आयोजनामे कार्यक्रम हुइल हो ।
कार्यक्रममे उ समुदायके व्यक्ति संविधानप्रदत्त अधिकार उपभोग कैना फेन ढेर समस्याके सामना करे परल कहटी आपन सवाल उठा डेहक लाग सञ्चार माध्यमहे आग्रह करले बटै ।
पुरुष पारलैंगिक राज चौधरी यौनिक अल्पसंख्यक समुदाय ढेर चुनौती भोग्टी रहल बटैलै । यौनिक तथा अल्पसंख्यक समुदायके व्यक्ति पैतृक सम्पत्तिसे फेन वञ्चित हुइटी रहल उहाँके कहाइ रहल बा ।
ओस्टके, चर्पी प्रयोगमे फेन टमान समस्या उत्पन्न हुइटी रहल ओरसे शौंचालयमे महिला, पुरुष शौचालय लेख्नासे फेन लंैगिकमैत्री शौंचालय लिखे पर्ना उ समुदायके जोड रहल बा । आपनहे बुझे नैसेक्न ओ समाजके व्यवहारके कारण यौनिक अल्पसङ्ख्यक समुदायके व्यक्तिमे मानसिक समस्या बह्रटी रहल जनाइल बा ।
नेपालके संविधानके धारा १२ मे यौनिक अल्पङ्ख्यक समुदायके नागरिकता ओ धारा १८ मे समानताके हकके व्यवस्था करल बा । मने, नागरिकता बनाइ जाइबर शरीर नंग्याइना जैसिन व्यवहार हुइना करल चौधरी गुनासो करलै । ओस्टके, यौनिक अल्पसंख्यक समुदायके व्यक्तिउपर परिवार ओ समाजके असमान व्यवहार आभिन फेन कायम रहल बटाइल बा ।
एकता नेपालके अध्यक्ष कृत्तिका चौधरी यौनिक अल्पसङ्ख्यक समुदायके व्यक्तिहे स्थानीय ओ प्रदेश सरकार लक्षित वर्गके कार्यक्रममे समेट्ना आवश्यक रहल बटैली ।
